पंतप्रधानांनी चीनविरोधात खंबीर भूमिका घ्यावी : तांबे 

संगमनेर : भारत-चीन सीमेवर गलवान खोऱ्यात शहीद झालेल्या 20 सैनिकांना मानवंदना देत तालुका कॉंग्रेसतर्फे मोदी सरकारच्या कुचकामी धोरणाविरुद्ध मूक निदर्शने करीत निषेध नोंदविण्यात आला. चीनविरोधात पंतप्रधानांनी खंबीर भूमिका घ्यावी, असे आवाहन आमदार डॉ. सुधीर तांबे यांनी केले.

आवश्‍य वाचा दोस्तींनी सोबत केली पार्टी... मग आवळला गळा 

नवीन नगर रोड येथील महात्मा गांधी यांच्या तैलचित्राजवळ कॉंग्रेसतर्फे मेणबत्ती प्रज्वलित करून "शहिदों को सलाम' उपक्रमात गलवानमधील हुतात्मा सैनिकांना आदरांजली अर्पण करण्यात आली.  डॉ. तांबे म्हणाले, की गलवानमधील घुसखोरीप्रकरणी 56 इंचाच्या छातीने सोयीस्कर मौनव्रत धारण केले आहे. सरकारने जनतेला सत्य सांगून, कणखर भूमिका घेऊन चीनला धडा शिकविला पाहिजे. कॉंग्रेससह संपूर्ण देश अशा संकटात सरकारच्या पाठीशी आहे. कोरोनाच्या संकटात गोरगरीब व हातावर पोट भरणाऱ्यांना थेट मदत दिली पाहिजे. आर्थिक मंदी वाढवणाऱ्या अस्थिरतेबाबत सरकार उपाययोजना करीत नसल्याबद्दल त्यांनी टीका केली. युवक कॉंग्रेसचे प्रदेशाध्यक्ष सत्यजित तांबे, तालुकाध्यक्ष बाबा ओहोळ, शहराध्यक्ष विश्‍वास मुर्तडक, सुरेश थोरात, संतोष हासे, अर्चना बालोडे आदी उपस्थित होते. 

हेही वाचा जिल्हा परिषद या चौदा मार्गातून उत्पन्न वाढविणार 

"स्पीक अप इंडिया'ला उदंड प्रतिसाद 
कॉंग्रेसचे प्रदेशाध्यक्ष बाळासाहेब थोरात यांच्या मार्गदर्शनानुसार सकाळी 11 ते 12 या वेळेत राज्यातील लाखो तरुणांनी "स्पीक अप इंडिया' मोहिमेत सहभाग घेत, केंद्र सरकारवर प्रश्‍नांची सरबत्ती केली. देशाचे संरक्षण, तरुणांना नोकऱ्या, भाववाढ, आर्थिक मंदी, जातीयवाद, कोरोना संकट याकडे लक्ष देण्याच्या व "मन की बात थांबवा, काम की बात करा' अशा सूचना तरुणांनी केल्या. 
.....