नेवाशात पुन्हा 'ऑडिओ बॉम्ब'! पोलिसाचे संभाषण व्हायरल

नेवासे (जि.अहमदनगर) : येथील पोलीस अधिकारी-वाळूतस्कर (sand smuggler) यांच्यातील कथित ऑडिओ क्लिप व्हायरल (audip clip viral) होऊन चोविस तास उलटत नाहीतर नेवाशातील एक पोलीस कर्मचारी (police staff) व एका व्यक्तीचे वाळूचे वाहन सोडण्यासाठी होत असलेली 'डील' व वाळू वाहनांच्या 'मंथली हप्तेखोरीच्या चर्चेची एक ऑडिओ क्लिप शुक्रवार (ता. १३) सोशल मीडियावर व्हायरल झाली. यामुळे वाळूचे अर्थकारण चव्हाट्यावर आल्याने महसूल व पोलीस प्रशासनात चांगलीच खळबळ उडाली.

काय आहे या व्हायरल 'ऑडिओ क्लिप' मध्ये?

या व्हायरल 'ऑडिओ क्लिप' मधील कथित एक पोलीस कर्मचारी व एका व्यक्तीत होत असलेल्या चर्चेतून नेवासे पोलीस ठाण्याच्या हद्दीत अवैध वाळू वाहतूक करणारे वाहन नेवासे पोलिसांनी पकडले. दरम्यान, हे वाळूचे वाहन पोलिसांनी सोडावे यासाठी मध्यस्थी करणारी व्यक्ती संबंधित पोलिसाला आठ हजार रुपये देउ करतो. मात्र, हा कर्मचारी या वाळू वाहनाचा मागील वीस हजार रुपयांचा 'हप्ता' अजून मिळाला नसल्याने तसेच आठ हजारांत वाहन सोडण्यास असमर्थता दाखवत असून उलट आम्ही मागत असलेली रक्कम न दिल्यास आम्ही गुन्हा दाखल करतो. संबंधित वाळू तस्कराने वाहन वकिलाला चार-पाच हजार रुपये देऊन कोर्टातून सोडावे असाही सल्ला दिला आहे. सलग दुसऱ्या दिवशी तीही पोलीसांचीच ऑडिओ क्लिप व्हायरल झाल्याने आतातर आपला नंबर नाही ना..! अशी शंका नेवासे पोलीस ठाण्याच्या पोलीस अधिकारी व कर्मचाऱ्यांना सतावत आहे.

चौकशीअंती कारवाई

सोशल मीडियावर व्हायरल झालेली पोलीस कर्मचारी व एक व्यक्तीची कथित ऑडिओ क्लिप मिळाली. त्याबाबत चौकशी करून दोषींवर कारवाई करण्यात येईल, असेही शेवगाव उपविभागीय पोलीस अधिकारी सुदर्शन मुंडे यांनी सांगितले.