कोविड टेस्टिंग प्रयोगशाळेला टाळे, एकमेव कर्मचाऱ्याची बदली

राहुरी : तालुक्‍यात काल विक्रमी 25 कोरोनाबाधितांची भर पडली. मागील 15 दिवसांत तब्बल 74 कोरोनाबाधित आढळले आहेत. अशा वेळी कोविड चाचण्या करणाऱ्या एकमेव कर्मचाऱ्याची आजपासून (मंगळवार) नगर येथे बदली झाली. त्यामुळे कर्मचाऱ्याअभावी शासनाची मोफत कोरोना चाचणी सेवा खंडित होऊन, प्रयोगशाळेला टाळे लागणार आहे. 

राहुरीतील प्रयोगशाळा वैज्ञानिक अधिकारी सुभाष मोरे शासनाच्या मोफत कोरोना चाचणी प्रयोगशाळेत कार्यरत होते. रोज 50 जणांच्या आरटीपीसीआर चाचण्या केल्या जात होत्या. त्यांना जिल्हा शल्यचिकित्सक डॉ. सुनील पोखरणा यांनी उद्यापासून (मंगळवार) नगर येथे जिल्हा रुग्णालयात हजर होण्याचा आदेश बजावला.

हेही वाचा - हिरण यांच्या हत्येप्रकरणी दोघांना अटक, लवकरच उलगडणार रहस्य

कोरोना चाचणी प्रयोगशाळेतील तात्पुरत्या कर्मचाऱ्यांना शासनाने पूर्वीच सेवेतून दूर केले आहे. राहुरीतील प्रयोगशाळा सहायक सौरभ वाल्मीक यांना पूर्वीच नगर येथे, तर प्रयोगशाळा तंत्रज्ञ ज्ञानेश्वर इघे यांना साकूर येथे वर्ग केले आहे. एकमेव राहिलेले मोरे यांनाही नगरला बोलाविल्याने राहुरीतील कोरोना चाचण्या बंद पडणार आहेत. 

तहसीलदार फसियोद्दीन शेख म्हणाले, ""राहुरीतील कोरोना चाचण्या बंद पडू नयेत, यासाठी जिल्हा शल्यचिकित्सक डॉ. सुनील पोखरणा यांच्याशी उद्या (मंगळवारी) बोलणार आहे. प्रयोगशाळा वैज्ञानिक अधिकारी मोरे यांची नगरला बदली झाल्याचे माहिती नव्हते.''