राहुरीत जलवाहिनी फुटल्याने बाजारपेठेतील रस्ता झाला जलमय

राहुरी (अहमदनगर) : शहरात गुरुवारी आठवडे बाजाराच्या दिवशी भर बाजारात राहुरी पालिकेच्या पिण्याच्या पाण्याची जलवाहिनी फुटली. पेठेतील रस्ता जलमय होऊन, गुडघाभर पाणी वाहू लागले. तब्बल एक तासात हजारो लिटर पाणी बाजारपेठेत वाहिले. आठवडे बाजारात भाजीपाला विक्रीसाठी बसलेल्या शेतकरी व ग्राहकांची तारांबळ उडाली. अनेक जणांचा शेतमाल पाण्याबरोबर वाहून गेला. पालिका कर्मचाऱ्यांनी पाणीपुरवठा बंद केल्यावर बाजारकरुंनी सुटकेचा निश्वास सोडला.

राष्ट्रवादीकडून शिवसेनेच्या उमेदवाराची कोंडी करण्याचा प्रयत्न

गुरुवारी दुपारी सव्वाबारा वाजता बाजारपेठेतील महाराष्ट्र बँकेसमोर जलवाहिनी फुटली. पेठेतील रस्त्यावरून गुडघाभर पाणी शनि-मारुती मंदिराच्या दिशेने वाहण्यास सुरुवात झाली. अचानक आलेल्या पाण्यामुळे भाजीपाला विक्रीसाठी बसलेल्या शेतकरी व व्यापाऱ्यांचा शेतमाल पाण्याबरोबर वाहून जाऊ लागला. बाजारात खरेदीसाठी आलेल्या ग्राहकांचीही तारांबळ उडाली. बाजारकरूंची शेतमाल वाचविण्यासाठी तारांबळ उडाली. 

नगर शहर होणार पंचतारांकीत, महापालिकेची फुल्ल तयारी

राहुरीच्या बाजारपेठेतून सहा इंच व्यासाची लोखंडी व १४ इंच व्यासाची सिमेंटची जलवाहिनी आहे. त्यातील नेमकी कोणती जलवाहिनी फुटली. याचा अंदाज येत नव्हता. १९९८ साली पसरविलेल्या या जलवाहिन्या जीर्ण व कमकुवत झालेल्या आहेत. जलवाहिनी फुटल्याची माहिती समजताच दुपारी सव्वाएक वाजता जलकुंभावरुन पाणी पुरवठा बंद करण्यात आला. पालिकेचे पाणीपुरवठा विभाग प्रमुख काकासाहेब आढागळे त्यांच्या पथकासह बाजारपेठेत दाखल झाले. जलवाहिनी फुटलेल्या ठिकाणाचा शोध घेऊन तात्काळ दुरुस्तीची कामे हाती घेण्यात आली.