"मी पुन्हा येईन, ही डरकाळी आता ‘लांडगा आला रे लांडगा' सारखीच

सोनई (जि.अहमदनगर) : ‘‘मी पुन्हा येईन, ही डरकाळी आता ‘लांडगा आला रे लांडगा आला’प्रमाणे झाली आहे. भाजपने राजकारणाच्या भिंतीवर कितीही डोके आपटले, तरी महाविकास आघाडी सरकार (mahavikas aghadi) पाच वर्षांचा कार्यकाळ पूर्ण करणारच,’’ असा विश्वास खासदार संजय राऊत (sanjay raut) यांनी व्यक्त केला. येथील (ता.३१) आमराई विश्रामगृहात झालेल्या शिवसंवाद कार्यक्रमात ते बोलत होते. (sanjay-raut-critised-bjp-marathi-news-jpd93)

नगर जिल्ह्याची ओळख ‘साखरसम्राटांचा जिल्हा’

आज नगर जिल्ह्याची ओळख ‘साखरसम्राटांचा जिल्हा’ म्हणून आहे. यापुढे ‘शिवसेनेचा जिल्हा’ म्हणून ओळख होण्यासाठी मंत्री गडाखांनी जोर लावावा, असे सांगून राऊत म्हणाले, ‘‘शिवसेना हा वाघाचा पक्ष म्हणून जन्माला आला असल्याने, प्रत्येक काम आणि भूमिका वाघासारखीच राहणार आहे. सत्ता आली असली तरी पक्षवाढ आणि सामाजिक कार्य सुरू ठेवण्यास अग्रक्रम द्या.’’ सचिव मिलिंद नार्वेकर व खासदार राऊत मुख्यमंत्री ठाकरे यांचे कान आणि डोळा असून, जिल्ह्यात पक्षाची ताकद अधिक वाढविण्यासाठी या दोघांनी जिल्हा दत्तक घ्यावा, असे मंत्री गडाख यांनी सांगितले. यावेळी खासदार लोखंडे यांचेही भाषण झाले. प्रास्ताविक जिल्हा संपर्कप्रमुख भाऊ कोरगावकर यांनी केले. अध्यक्षस्थानी खासदार सदाशिव लोखंडे होते. शिवसेनेचे सचिव मिलिंद नार्वेकर, जलसंधारणमंत्री शंकरराव गडाख, महापौर रोहिणी शेंडगे, माजी आमदार विजय औटी, जिल्हाप्रमुख रावसाहेब खेवरेंसह पदाधिकारी व सर्व तालुकाध्यक्ष उपस्थित होते.

ऑक्सिजन प्रकल्पाचे उद्‍घाटन

शनैश्‍वर देवस्थान ट्रस्टच्या वतीने साकारलेल्या ऑक्सिजन प्रकल्पाचे उद्‍घाटन खासदार संजय राऊत यांच्या हस्ते करण्यात आले. कार्यक्रमास जिल्हाधिकारी डॉ. राजेंद्र भोसले, देवस्थानचे अध्यक्ष भागवत बानकर, उपाध्यक्ष विकास बानकर उपस्थित होते. यावेळी दीपक फर्टिलायझरचे प्रमुख नरेश देशमुख यांचा सत्कार करण्यात आला.