श्रीगोंद्यात डॉक्‍टरांना फुटला कंठ.. लॉकडाउनमध्ये जोपासला गायनाचा छंद 

श्रीगोंदे : अनेकांना वेळच नव्हता.. ना घरच्यांसाठी, ना मित्रांसाठी..! मात्र; कोरोना आला आणि सगळेच लॉकडाऊन झाले. मग काय, तरुणपणात राहिलेली हौस भागविण्यासाठी सोशल मीडियाचे आयतेच साधन मिळाले आणि अनेकांच्या गळ्याला कंठ फुटला. "बाथरुम सिंगर'च्या इमेजमधून बाहेर पडून अनेकांनी "सोशल मीडिया सिंगर' म्हणवून घ्यायची हौस भागवली. त्यात डॉक्‍टर पेशातील हरहुन्नरी लोकही दिसून आले. 

हेही वाचा : नगरमध्ये आणखी पाच कोरोनाबाधित 

कोरोना आला आणि लॉकडाऊन झालेल्या अनेकांनी त्यांच्या सुप्त इच्छा-अपेक्षा, या आरामाच्या दिवसात उपभोगून घेतल्या. नेते मंडळींना ना कुणाचा अंत्यविधी, ना दशक्रियाविधी.. ना कुणाच्या विवाहाला हजर राहण्याचा आग्रह, ना पार्टी मिटिंगचा फोन.. त्यामुळे नेत्यांनीही त्यांच्या आवडींना स्थान दिले. व्यायाम, वाद्य वाजविणे, योगा शिकतानाच काहींनी पोहण्याचीही मजा लुटली.. 

हौसी डॉक्‍टरांनी लुटला आनंद

लॉकडाऊन काळात श्रीगोंद्यात सर्वाधिक आनंद लूटला, तो हौसी डॉक्‍टरांनी..! कारण, महाविद्यालयीन शिक्षणानंतर प्रॅक्‍टिस, कर्ज, पेशंट व हॉस्पिटलमध्ये सगळेच व्यस्त झाले होते. परिणामी, सगळे छंद बाजूला राहिले. स्वतःच्या आवडीनिवडीकडेही त्यांना लक्ष द्यायला वेळच नव्हता. लॉकडाऊनमध्ये पेशंटची संख्या घटली आणि हे या छंदिष्ट लोकांच्या पथ्यावरच पडले. 

"सोशल मीडिया सिंगर' झाले

इतर वेळेसारखे "स्लॅक सिझन'मध्ये पिकनिकला जाता येत नव्हते. त्यामुळे रिकाम्या वेळेत "बाथरूम सिंगर'च्या इमेजमधून बाहेर पडून अनेक जण "सोशल मीडिया सिंगर' झाले. सोशल मीडियावर एकट्याने गायन करुन, कसे गातो, असे विचारताना एखाद्या मित्राला भरपूर "लाईक्‍स' मिळाल्याचे पाहून "आपण काय कमी' असे म्हणत दुसऱ्यालाही कंठ फुटण्याचे प्रमाण वाढले. कोरोनाच्या साथीत डॉक्‍टरची इमेज (त्यातल्या त्यात) सुधाल्याने व कोणी नावे ठेवणार नसल्याची खात्रीही पटली. त्यामुळे काहींना गाता येत नसतानाही फक्त ओठ हलवून गाणी डब करून वाहवा मिळविण्यासाठी काहींची धडपड सुरू असल्याचेही दिसले. 

वयाच्या पन्नाशीतही डान्सचा जलवा

"स्टार मेकर' ऍपच्या माध्यमातून काहींनी आवडत्या गायकासोबत गात असल्याचे इतरांना भासवून स्वत:ला खूश करुन घेतले. हेही काय थोडंक.. काही तर पन्नाशीनंतरही "गोविंदा'ला लाजवतील, असा डान्स करीत होते. "अभी तो मै जवॉं हूँ' दाखविण्याच्या त्यांच्या प्रयत्नाला चांगली दाद मिळाली. काहीही असो, कोरोनामुळे डॉक्‍टर मंडळींना स्वतःमधील सुप्त कलागुणांना जगासमोर मांडण्याची संधी मिळाली.. त्याचं त्यांनी सोन केलं हे नक्की..!