Ahmednagar | एक रकमी FRP साठी स्वाभिमानी शेतकरी संघटना आक्रमक

राहुरी (जि. अहमदनगर) : राहुरी फॅक्टरी येथे स्वाभिमानी शेतकरी संघटनेने अचानक आक्रमक भूमिका घेतली. ऊस दराची कोंडी फोडण्यासाठी संघटनेचे उत्तर जिल्हाध्यक्ष रवींद्र मोरे यांच्या नेतृत्वाखाली संगमनेर भाग सहकारी साखर कारखान्याच्या राहुरी फॅक्टरी येथील कार्यालयाला कुलूप ठोकून, कर्मचाऱ्यांना कोंडून घेतले. कार्यालयातील एक फाईल व काही कागदपत्रे जाळून टाकण्यात आली.

जिल्ह्यातील साखर कारखाने सुरू करू देणार नाहीचा इशारा

"कोण म्हणतो देणार नाही. घेतल्याशिवाय राहणार नाही. एक रकमी एफआरपी (FRP) मिळालीच पाहिजे." अशा घोषणा देत स्वाभिमानी शेतकरी संघटनेचे कार्यकर्ते महसूल मंत्री बाळासाहेब थोरात (Balasaheb Thorat) यांच्या नेतृत्वाखालील संगमनेर भाग सहकारी साखर कारखान्याच्या राहुरी फॅक्टरी येथील शेतकी कार्यालयात घुसले. कार्यालयातील एक फाईल व काही कागदपत्र घेऊन बाहेर आले. संगमनेर कारखान्याच्या कर्मचाऱ्यांना कार्यालयात कोंडून, रवींद्र मोरे यांनी कार्यालयाला कुलूप ठोकले. कार्यालयाबाहेर कारखान्याची फाईल व कागदपत्रे जाळून टाकली.

यावेळी बोलतांना मोरे म्हणाले, "सांगली, सातारा, कोल्हापूर जिल्ह्यात स्वाभिमानी शेतकरी संघटनेचे अध्यक्ष माजी खासदार राजू शेट्टी (Raju Shetti) यांच्या नेतृत्वाखाली ऊसदराची कोंडी फुटली आहे. परंतु, नगर जिल्ह्यातील साखर कारखानदारांनी येत्या २०२१-२२ गाळप हंगामात शेतकऱ्यांना किती ऊस दर देणार? हे अद्याप जाहीर केलेले नाही. कारखान्यांचा गळीत हंगाम दिवाळी सणा नंतर सुरू होईल. राज्य सरकार मधील सत्ताधारी मंत्री असोत वा विरोधी पक्षनेते. ऊस दराची कोंडी फोडून, एकरकमी एफआरपी देण्याची घोषणा करीत नाहीत. तोपर्यंत जिल्ह्यातील त्यांचे साखर कारखाने सुरू करू देणार नाही. त्यासाठी ठिकाणी तीव्र आंदोलने छेडली जातील."

आंदोलनाची मशाल प्रातिनिधिक स्वरूपात पेटविली

"संगमनेर कारखान्याने मागील वर्षी त्यांच्या कार्यक्षेत्रातील शेतकऱ्यांना दिलेला ऊस दर कार्यक्षेत्र बाहेरून आणलेल्या शेतकऱ्यांच्या उसाला दिलेला नाही. त्यामुळे, संगमनेर कारखान्याच्या कार्यालयात घुसून, प्रातिनिधिक स्वरूपात आंदोलनाची मशाल पेटविली आहे." - रवींद्र मोरे, स्वाभिमानी शेतकरी संघटना जिल्हाध्यक्ष.

मोरे यांच्यासह स्वाभिमानीचे तालुकाध्यक्ष सतीश पवार, सुनील इंगळे, आनंद वने, सतीश पवळे, सचिन म्हसे, अरुण डौले, दिनेश वराळे, प्रमोद पवार, किशोर वराळे, हर्ष करपे, शुभम फसले, राहुल करपे, संदीप शिरसाठ आदी शेतकऱ्यांनी आंदोलनात भाग घेतला.