दोन महिन्यांपासून त्यांना मिळतायेत नरक यातना 

नगर : कोठी परिसरातील हेरिटेज अपार्टमेंटमध्ये दोन महिन्यांपूर्वी गटारीचे पाणी शिरले. आमदार संग्राम जगताप, नगरसेवक अविनाश घुले, आयुक्‍त श्रीकांत मायकलवार, उपायुक्‍त डॉ. प्रदीप पठारे यांनी दहा दिवसांपूर्वी अपार्टमेंटला भेट दिली. आमदार संग्राम जगताप यांनी दोन दिवसांत प्रश्‍न सोडविण्याच्या सूचना दिल्या. मात्र प्रत्यक्षात या भेटीनंतर दहा दिवस होऊनही गटारीचे मैलामिश्रीत पाणी अपार्टमेंटमधून गेले नाही. महापालिका अधिकारी व कर्मचाऱ्यांनी आमदार संग्राम जगताप यांच्या सूचनांना केराची टोपली दाखविली आहे. त्यामुळे या अपार्टमेंटमधील नागरिकांना आरोग्य समस्या भेडसावू लागल्या आहेत. 

अवश्य वाचा - युवा नेत्यासह २३ जणांना कोरोनाची बाधा रॅपीड तपासणीत आढळले पाच रुग्ण

महापालिकेच्या आपत्ती व्यवस्थापनाच्या कामाची परिस्थिती दाखवत यंदा पहिल्या पावसातच शहरातील विविध भागांत ओढे, नाले व गटारींचे पाणी नागरिकांच्या घरात शिरले. महापालिकेला उन्हाळ्यात करायची नालेसफाईची कामे ऐन पावसाळ्यात करावी लागली. तरीही परिस्थिती हाता बाहेर जात आहे. हातमपुरा, रामचंद्रखुंट, मंगलगेट परिसरातील नाल्याचे पाणी हेरिटेज अपार्टमेंटच्या चेंबरला नेऊन मिळविण्यात आले आहे. या नाल्यावर पुढे जाऊन अतिक्रमणे झालेली आहेत. त्यामुळे दोन महिन्यांपूर्वी हेरिटेज अपार्टमेंटमध्ये पाणी शिरले. अपार्टमेंटच्या पार्किंगचा गटारीच्या पाण्याने ताबा घेतला आहे. नळ व कुंपनलिकेलाही मैलामिश्रीत पाणी येत आहे. त्यामुळे पाण्याचा प्रश्‍न निर्माण झाला आहे. पार्किंगमध्ये असलेल्या गटारीच्या पाण्यात डासांची निर्मिती झाली आहे. या पाण्याच्या वासामुळे नागरिकांना पोटदुखी, जुलाब असे आजार जडले आहेत. आमदार संग्राम जगताप यांनी सूचना करूनही प्रश्‍न सुटत नसल्याने नागरिकांत महापालिका प्रशासना विषयी तीव्र नाराजी आहे. 

हेरिटेज अपार्टमेंटमध्ये 54 घरे आहेत. गटारीचे मैलामिश्रीत पाणी अपार्टमेंटमधील पार्किंगमध्ये गेल्याने आरोग्याचा प्रश्‍न निर्माण झाला आहे. महापालिका अधिकाऱ्यांकडून उडवा उडवीची उत्तरे मिळत आहेत. हा प्रश्‍न दोन दिवसांत सोडविला गेला नाही तर कोणत्याही क्षणी कोठी रस्ता रोको आंदोलन करण्यात येईल. 
- ऍड. शिवाजी कराळे, स्थानिक नागरिक