अहमदनगर : सव्वातीन लाखांची तंबाखू जप्त; तोफखाना पोलिसांची कारवाई

अहमदनगर : तोफखाना पोलिसांच्या पथकाने सोमवारी (ता. ३१) रात्री साडेअकरा वाजता सिव्हिल हडको येथे छापा टाकून तीन लाख २२ हजार ५६ रुपयांची तंबाखू व पानमसाला जप्त केला.पोलिस निरीक्षक ज्योती गडकरी यांच्या मार्गदर्शनाखाली पोलिस उपनिरीक्षक समाधान सोळंके यांच्या पथकाने ही कारवाई केली.

याप्रकरणी पोलिस कॉन्स्टेबल दीपक आव्हाड यांच्या फिर्यादीवरून संतोष गोकुळ साळवे (वय ४७, रा. जे. जे. गल्ली, मंगलगेट) याच्याविरुद्ध गुन्हा दाखल करण्यात आला आहे.राज्यात तंबाखू, पानमसाला विक्रीस प्रतिबंध असताना त्यांची विक्री करण्याच्या उद्देशाने मुद्देमाल आढळून आला. एक लाख ६४ हजार १६० रुपये किमतीचा आरएमडी पान मसाला, ५४ हजार किमतीचे एम सेंटेड टोबॅको गोल्ड असे लिहिलेले तीन मोठे बॉक्स, २ हजार ३८८ रुपये किमतीची तंबाखू, ९ हजार ५०४ रुपये किमतीचा केसरयुक्त विमल पानमसाला, ७४ हजार ४४८ रुपये किमतीचा केसरयुक्त विमल पानमसाला लिहिलेले ३७६ पाऊच, असा मुद्देमाल हस्तगत केला.