वैधव्याच्या जखमेवर सौभाग्यलेण्याच्या भेटीने फुंकर

टाकळी ढोकेश्वर - कोल्हापूर जिल्ह्यातील शिरोळ तालुक्यातील हेरवाड गावाने विधवा प्रथेला मूठमाती देण्याचा ऐतिहासिक निर्णय घेतल्यानंतर तोच पॅटर्न राबविण्यासाठी राज्यातील अनेक गावे पुढाकार घेत आहेत. मात्र, पारनेर तालुक्यातील रांधे गावाने एक पाऊल पुढे टाकत हा कायदा, ठराव प्रत्यक्ष कृतीत आणला आहे. वटपौर्णिमेनिमित्त गावातील विधवांना सौभाग्याचे लेणे असणारा चुडा, कुंकवाचा करंडा, साडी देऊन सन्मानित करण्यात आले.

रांधे गावाने याअगोदरच विधवा प्रथा बंद करण्याचा निर्णय घेतला आहे. उपसरपंच संतोष काटे यांनी वटपौर्णिमेनिमित्त विधवा महिलांचा सन्मान करून, हा कायदा आपण कृतीत आणू, अशी संकल्पना गावासमोर मांडली. त्यास विनोद फापाळे, संतोष आवारी यांची साथ मिळाली व आज हा कार्यक्रम गावातील वटवृक्षासमोर पार पडला. गावातील विमल आवारी, हिराबाई चौधरी यांना चुडा, कुंकवाचा करंडा व साडीची भेट देऊन सन्मान करण्यात आला.

यावेळी शंकुतला क्षीरसागर, वत्सला रोकडे, शायरा तांबोळी यांनी महिलांना हळद-कुंकू लावून चुडा व साडी देऊन सन्मान केला. सरपंच अरुण आवारी, उपसरपंच संतोष काटे, भगवान पावडे, अप्पासाहेब काटे, प्रमोद गायकवाड, अमोल शिंदे, अविनाश आवारी उपस्थित होते. या महिलांनीही आजपासून कुंकू लावून हिरव्या बांगड्या घालण्याचा निर्णय घेतला आहे.

विधवा प्रथाबंदीमुळे वैधव्य आलेल्या अनेक महिलांच्या चेहऱ्यावर समाधानाची आणि सन्मानाची कळी खुलणार आहे. या निर्णयाने विधवांचे सौभाग्यालंकार कायम राहतील. ही प्रथा बंद झाल्यामुळे विधवांना धार्मिक कार्यात सहभागी होता येईल.

- विमल आवारी, एकल महिला.

कायदे, ठराव सगळीकडे होतात. मात्र विधवा महिलांना समाजाच्या मुख्य प्रवाहात आणण्यासाठी कृतियुक्त कार्यक्रम आवश्यक आहे. आज आम्ही गावातील विधवा महिलांना चुडा, कुंकवाचा करंडा, साडी देऊन सन्मान केल्याने हा कायदा आम्ही प्रत्यक्षात कृतीत आणून समाजास दिशा दिली आहे.

- संतोष काटे, उपसरपंच, रांधे.