अकोला : थंडीची लाट ओसरली; किमान तापमानात वाढ

अकोला : आठवड्याच्या सुरुवातीला जिल्ह्यातील नागरिकांना कडाकाच्या थंडीचा सामना करावा लागला. त्यामुळे काही प्रमाणात जनजीवन सुद्धा प्रभावित झाले होते. परंतु आता थंडीची लाट ओसरली आहे. त्यासोबतच किमान तापमानात सुद्धा वाढ झाली आहे. त्यामुळे नागरिकांना अंशतः दिलासा मिळाल्याचे दिसून येत आहे.

उत्तरेकडून येणाऱ्या थंड वाऱ्यांमुळे गत काही दिवस जिल्ह्याच्या किमान तापमानात वेगाने घट झाली होती. विदर्भ, उत्तर महाराष्ट्रासह, मराठवाड्यात किमान तापमान ११ अंश सेल्सियसच्या खाली आले होते. दरम्यान आता उत्तर भारतातील राज्यांमध्ये थंडीची लाट ओसरल्यानंतर राज्यातही गारठा कमी झाला आहे. दिवसाच्या कमाल तापमानात चढ-उतार सुरूच आहे. परंतु किमान तापमानात वाढ झाल्याने जिल्ह्यातून थंडी काही प्रमाणात गायब झाल्याचे दिसून येत आहे.

त्यामुळे नागरिकांना कडाक्याच्या थंडीपासून अंशतः दिलासा मिळाल्याचे दिसून येत आहे. उत्तरेकडी राज्यांमध्ये बर्फवृष्टी झाल्यामुळे जिल्ह्यात २०, २१ व २२ डिसेंबर रोजी थंडीचा जोर सर्वाधिक होता. त्यामुळे महानगरात दिवसभर वातावरणात गारठा जाणवत होता, रात्री कडाक्याच्या थंडीने जनजीवन प्रभावित झाले होते. परंतु २३ डिसेंबरपासून मात्र थंडीचा जोर कमी झाला. त्यामुळे नागरिकांना काही प्रमाणात दिलासा मिळाला.

मंगळवारपासून पावसाची शक्यता

राज्याच्या किमान तापमात वाढ होण्याची शक्यता असल्याने थंडी आणखी कमी होण्याचे संकेत आहेत, तर बंगालच्या उपसागरावरून वाहणाऱ्या वाऱ्यांमुळे पावसाला पोषक हवामान होणार असल्याने मंगळवार (ता. २८) पासून जिल्ह्यात तुरळक ठिकाणी पाऊस होण्याची शक्यता हवामान विभागाने व्यक्त केली आहे. त्यामुळे पुढील आठवड्यात हवामानात आणखी बदल दिसून येऊ शकते.

तापमानावर दृष्टीक्षेप

• तारीख - किमान - कमान

• १८ डिसेंबर - १४.६ - २९.३

• १९ डिसेंबर - १४.७ - २८.०

• २० डिसेंबर - ११.३ - २७.२

• २१ डिसेंबर - ११.० - २९.०

• २२ डिसेंबर - ११.३ - ३१.५

• २३ डिसेंबर - १२.४ - ३२.५

• २४ डिसेंबर - १३.८ - ३१.७

• २५ डिसेंबर - १५.१ - ३०.८

• २६ डिसेंबर -१४.६ - ---