अकाेला : सोशल मीडियावर फीशिंग मेसेज व्हायरल

शिरपूर जैन : अनेकांच्या व्हाट्स ॲप ग्रुपवर गेल्या काही दिवसापासून मोबाईल रिचार्ज वापरकर्त्यांना मिळवून दिला जाणारा मेसेज व्हायरल होत आहे, त्यात ५९९ रुपयांचा फ्री रिचार्ज आपणास मिळत असलयाचे सांगितले जाते. परंतु हा मेसेज फसवा आहे, त्या लिंकवर क्लिक केल्यास तुमचे बँक खाते हॅक होण्याची शक्यता असते व बँक खाते रिकामे होऊ शकते. सायबर गुन्हेगारांचा फीशिंग मेसेज असल्याचे सायबर पोलिसांनी स्पष्ट केले आहे.

हा मेसेज फेक म्हणजेच बनावट असून त्यावर क्लिक केल्यानंतर मोबाईलमधील डाटा सायबर हॅकर्सच्या हाती लागतो, दिलेल्या लिंकवर क्लिक केले असता एकूणच माहिती उघडते, ज्यात तुम्ही मोफत रिचार्जसाठी पात्र आहात असे नमूद असते. याप्रकारे नंतर एक एक करीत चार पाच प्रश्नांची उत्तरे विचारले जातात. त्यानंतर ही लिंक १५० लोकांना पाठविण्यास सांगितले जाते. अशा प्रकारे अनेक जण या फ्री मोहजाळ्यात अडकत आहेत. हा एक फीशिंग मेसेज असून यावर क्लिक करताच आपली पूर्ण माहिती हॅकरला प्राप्त होते.

यात व्हाट्सअप प्रोफाइल, मेल आयडी आणि आपल्या सर्व डिटेल व लोकेशन सुद्धा हॅकर्सच्या नियंत्रणात असते. यावर लिंक व क्लिक करताच आपल्या मोबाईलवर एक मालवेअर डाउनलोड होतो. याद्वारे तुमचा मोबाईल नंबर, तसेच व्हाट्स ॲपवर नियंत्रण करून ओटीपी सुद्धा मिळवू शकतो. यासंदर्भात सायबर पोलिसांनी एक पत्रक जाहीर केले आहे. अशा पद्धतीची कोणतीही योजना संबंधित कंपनीकडून घोषित केलेली नाही. नागरिकांनी अशा संदेशांवर विश्वास ठेवून लिंकवर क्लिक करू नये व आपली वैयक्तिक माहिती देऊ नये असे आवाहन केले आहे.

अज्ञात लिंकवर क्लिक करू नये

हल्ली बहुतांशी जणाच्या मोबाईलमध्ये ई वालेट वापरले जातात. पैशाच्या हस्तांतरणासाठी त्याचा वापर केला जात आहे, परंतु ऐनवेळी व्यवहार झाला नाही तर मग आपण असा प्रयत्न करतो की तो भामट्यासाठी पर्वणी ठरू शकतो. कोणत्याही अज्ञात लिंकवर जाणे धोकादायक ठरू शकते. सर्व गोष्टी फॉलो केल्या की फॉलो करणाऱ्याच्या ई वालेटची माहिती हॅकर्सच्या डेस्कटॉपला जाते. यातून मोठा धोका होऊ शकतो. त्यामुळे अशा लिंकवर क्लिक करून धोका पत्करू नये असे आवाहन करण्यात आले आहे.