राग अनावर : जावयाने सासूला ढकलले विहिरीत; बुडून मृत्यू

बाळापूर (जि. अकोला) : घरगुती भांडणात (Domestic dispute) बोलण्याचा राग धरत जावयाने सासूला विहिरीत फेकल्याने (pushed her mother-in-law into well) मृत्यू झाला. मुलगा ज्ञानेश्वर डाखोरे (२३, रा. अंधार, सांगवी, ता. पातूर) याने बाळापूर पोलिस ठाण्यात तक्रार दिल्यानंतर पोलिसांनी घटनास्थळ गाठत पंचनामा करून मृतदेह शवविच्छेदनासाठी पाठविला. चंद्रकलाबाई डाखोरे (वय ६०) असे मृत महिलेचे नाव आहे. तर विलास मारोती इंगळे (रा. दुर्गपुर ता. मेहकर) असे आरोपी जावयाचे नाव आहे.

ही घटना सोमवारी रात्री साडेदहा वाजताच्या सुमारास घडली. मंगळवारी सकाळी शेतमालक शेतात आले असताना हा प्रकार उघडकीस आला. त्यांनी याबाबत बाळापूर पोलिसांना माहिती दिली. घटनेची माहिती मिळताच बाळापूर पोलिस ठाण्याचे पोलिस निरीक्षक भाऊराव घुगे, सहायक पोलिस निरीक्षक विनोद घुईकर, पोलिस उपनिरीक्षक गजानन रहाटे व पोलिस कर्मचाऱ्यांनी घटनास्थळी धाव घेतली. विहिरीतील (Drowning) मृतदेह बाहेर काढण्यात आला. याप्रकरणी बाळापूर पोलिस ठाण्यात खुनाचा गुन्हा दाखल करण्यात आला आहे.

आरोपी घटनास्थळावरून फरार

सोमवारी रात्री ही घटना घडल्यानंतर विलास इंगळे हा घटनास्थळावरून पळून गेला. त्याच्या मागावर बाळापूर पोलिसांचे एक पथक रवाना झाले आहे. बुलडाणा जिल्ह्यात पोलिस त्याचा शोध घेत आहेत.