‘डॉ. पंदेकृवि’ ची राष्ट्रीय पातळीवर २६ व्या स्थानी भरारी

अकोला : सन २०२० मधील भारतीय कृषी अनुसंधान परिषद नवी दिल्लीच्या राष्ट्रीय पातळीवरील मानांकनात देशभरातील ७२ कृषी विद्यापीठापैकी ६७ विद्यापीठांनी सहभाग नोंदवीला होता. अकोला येथील डॉ.पंजाबराव देशमुख कृषी विद्यापीठाने कुलगुरु डॉ. विलास भाले यांच्या मार्गदर्शनात शैक्षणिक, संशोधनात्मक तथा विस्तार कार्याचा आलेख दरवर्षी उंचावत ४८ व्या (२०१८) स्थानापासून ३८ (२०१९ ) आणि यंदा २६ व्या (२०२०) स्थानावर मजल मारली आहे.भारतीय कृषी अनुसंधान परिषद नवी दिल्ली अंतर्गत देशभरातील सर्वच कृषी विद्यापीठे कार्यरत असून, विद्यापीठांचा शैक्षणिक, संशोधनात्मक तथा विस्तार कामांचा वार्षिक आढावा दरवर्षी परिषदेच्या माध्यमातून घेण्यात येतो. विद्यापीठांमधील उपलब्ध सोयी सुविधा, संशोधक, प्राध्यापक, विद्यार्थी वर्गांची शैक्षणिक व संशोधनात्मक कामगिरी तथा विद्यापीठाचा कृषी तथा तत्सम विभागामार्फत कृषी विस्तार कार्यक्रमाचा लेखाजोखा या निमित्ताने दरवर्षी तपासला जातो.

राष्ट्रीय पातळीवर बहुतेक संस्था केवळ शिक्षण अथवा संशोधन कार्यात सहभागी असून, महाराष्ट्रातील डॉ. पंजाबराव देशमुख कृषी विद्यापीठ, कृषी शिक्षण, कृषी संशोधन यासह कृषी विस्तार या तीनही बाजुंवर एकाच वेळी कार्यरत असून, उपलब्ध मनुष्यबळ व संसाधने यांचा सुरेख ताळमेळ साधत आहे. विद्यापीठाच्या तत्कालीन संचालक शिक्षण डॉ. महेंद्र नागदेवे, संचालक संशोधन डॉ. विलास खर्चे, संचालक विस्तार शिक्षण डॉ. राजेंद्र गाडे, कुलसचिव डॉ. सुरेंद्र काळबांडे, विद्यापीठ नियंत्रक राजीव कटारे, यांचेसह त्यांचे संबंधित अधिकारी, कर्मचारी वर्गाच्या प्रयत्नातून आणि विद्यापीठ नोडल अधिकारी डॉ. शशांक भराड, विद्यापीठ रँकिंक संदर्भात गठीत विशेष समितीच्या सर्व सदस्यांच्या प्रभावी नियोजनातून विद्यापीठातील सर्वच विभागांनी सर्वोत्तम योगदान देण्याचा प्रयत्न केला आणि त्याचेच फळ म्हणून विद्यापीठाला राष्ट्रीय पातळीवर २६ व्या स्थानी झेप घेणे शक्य झाल्याचे प्रतिपादन कुलगुरू डॉ. विलास भाले यांनी याप्रसंगी केले आहे.

विद्यापीठ स्तरीय संचालक, शास्त्रज्ञ, प्राध्यापक, अधिकारी, कर्मचारी, कामगार, विद्यार्थी वर्गासह सर्वांचे अभिनंदन तथा ऋण व्यक्त करतांना भविष्यात देखील हाच एकोपा आणि त्यागाची भावना जोपासत शेतीचे शिक्षण घेणारे विद्यार्थी आणि शेतकरी बंधू-भगिनींसाठी सर्वोत्तम देण्याचा सर्वांनीच प्रयत्न करावा, असा आशावाद देखील याप्रसंगी कुलगुरूंनी व्यक्त केला.