Akola : ग्रामसेवकाने केला गावाचा कायापालट; विकास निधीचा योग्य वापर

पातूर (जि. अकोला) : एखाद्या अधिकाऱ्याने मनावर घेतले की, अति दुर्गम भागातील हातावर मोजण्या एतक्या लोकवस्ती गावाचाही विकास करू शकतो. शासनाच्या विविध योजनांच्या निधीची योग्य अंमलबजावणी करून गावाचा कायपालट करण्याची हिम्मत दाखवू शकतो. त्यासाठी कामाप्रति एकनिष्ठ असणारे अधिकारी वर्ग असणे आवश्‍यक आहे. इमानदारी व मेहनतीने काम करण्यासाठी स्थानिक लोकप्रतिनिधी व नागरिकांचाही सहभाग असणे गरजेचे आहे. असाच आपल्या कामाचा प्रत्यय कामाप्रति एकनिष्ठ असलेल्या ग्रामसेवकाने घडवून आणला आणि सावरगावाचा विकास बोलू लागला.

तालुक्यातील बुलडाणा व अकोला जिल्ह्याच्या सीमेवरील शेवटचे गाव असलेले ग्राम सावरगाव येथे अनेक वर्षांपासून सुविधांचा अभाव होता. मात्र, ग्रामसेवक शिवकुमार सर्जे यांनी पदभार हाती घेतला व सावरगाव या गावाचा कायापालट होण्यास सुरुवात झाली. कर्तव्यदक्ष ग्रामसेवक शिवकुमार सर्जे यांनी गावात शासनाने दिलेल्या निधीमधून स्मशानभूमिला गेट, तार कंपाउंड, पेव्हर ब्लॉक बसविले असून, दलित वस्तीमध्ये अंदाजे २५ लाख रुपयाची महत्त्वाची कामे केली.

डॉ. बाबासाहेब आंबेडकर यांच्या पुतळ्याजवळ पेव्हर बसविणे, लहान मुलांसाठी असलेल्या अंगणवाडीत विविध कामे करून बोलकी अंगणवाडी तयार केली. तसेच, तांडावस्ती येथे समाजगृह पूर्णत्वास नेले, गावातील नाल्या, रस्ते आदी कामे करून आपली कामावरची निष्ठा व कर्तव्यदक्षता दाखवून ग्रामवासियांची मने जिंकली. ग्रामसेवक शिवकुमार सर्जे व सरपंच बलक यांनी गावात सामाजिक सलोखा राखून, ‘एकच ध्यास गावाचा विकास’ या पद्धतीने काम करत आहेत.

त्यांच्या या कर्तव्यनिष्ठपणामुळे अल्पवधीत सावरगाव येथे अंदाजे ५० लाख रुपयांचे विकास कामे हाती घेतली आहेत. त्यांनी केलेल्या कामाचे कौतुक स्थानिक नागरिकांकडून केल्या जात आहे. ग्रामसेवक सर्जे हे गावकऱ्यांना शासनाने दिलेल्या विविध योजनांची माहिती वेळोवेळी देत आहेत. नेहमी सावरगाव येथे आपल्या कर्तव्याच्या ठिकाणी हजर राहत असल्यामुळे नागरिकांमध्ये आनंदी वातावरण आहे. विशेष म्हणजे ग्रामसेवक सर्जे व सरपंच बलक यांनी गत अडीच वर्षाच्या कालावधीत केलेल्या विकास कामाबाबतीत सावरगाव वासियांनी कधीच तक्रार केली नाही.