मुगाला मिळतोय चांगला भाव, आवकही वाढली

खामगाव (जि. बुलडाणा) : खामगाव कृषी उत्पन्न बाजार समितीत (Khamgaon APMC) यंदाच्या खरीप हंगामातील नवीन मूग शेतकरी विक्रीस आणत आहेत. २३ ते २८ ऑगस्ट या सहा दिवसांच्या कालावधीत ५८४ पोते मूग विक्रीस आला होता. गत वर्षीच्या तुलनेत चांगल्या दर्जाच्या मुगाला ४०० रुपये अधिक भाव (mung rate) आहे. गत वर्षी चांगल्या दर्जाच्या मुगाला ७ हजार १०० रुपये प्रतिक्विंटल भाव देण्यात आला होता.

येथील कृषी उत्पन्न बाजार समितीत नवीन मूग खरेदीचा शुभारंभ २३ ऑगस्ट रोजी झाला. शुभारंभाच्या दिवशी ४४ पोते विक्रीस आले होते. खामगाव बाजार समितीत जिल्ह्यातील घाटावरील व घाटाखालील शेतकरी मूग विक्रीस आणत आहेत. मुगाला भाव चांगला मिळतो आणि सायंकाळपर्यंत विकलेल्या मुगाचे पैसेही त्याच दिवशी हातात येतात. त्‍यामुळे शेतकरी खामगाव बाजार समितीला प्राधान्‍य देत आहेत. साधारणतः नवीन मूग ऑगस्ट महिन्याच्या दुसऱ्या आठवड्यात बाजार समितीत विक्रीस येतो. सप्टेंबरमध्ये मुगाची आवक अधिक असते. याच महिन्यात नवीन उडीद शेतकरी विक्रीस आणतात. मूग व उडदाची विक्री करून त्यातून मिळालेल्या पैशांतून शेतकरी सण साजरे करतात. येथील बाजार समितीत धान्याची आवक बाराही महिने असते परंतु, नवीन उडीद, मूग आला की हळूहळू आवक वाढत जाते. दिवाळीपर्यंत अधिक आवक असते. त्यानंतर आवक कमी होत जाते. सध्या बाजार समितीमध्ये अधिक प्रमाणात धान्याचे ढीग दिसून येत आहेत. तसेच धान्याची आवक वाढल्याने हमाल, मापारी व अन्य मजुरांना चांगली मजुरी मिळत आहे.

सहा दिवसांच्या कालावधीत मुगाची आवक

दिनांक कमी भाव जास्त भाव आवक

• २३ ६००० ७ हजार १४४ क्विं.

• २४ ६५०० ७५०० २४ क्विं.

• २५ ४ ६०० ७ ४०५ ३७ क्विं.

• २६ ५१२५ ७ ५०० ६९ क्विं.

• २७ ६००० ७००० २८९ क्विं.

• २८ ६२०० ७ ३०० ११९ क्विं