वादळी वार्‍यात पपई फळाचा मळा उद्ध्वस्त

घाटबोरी (बुलडाणा) : मेहकर तालुक्यामधील अंजनी बुर्दुक सर्कलमधील आलेगाव येथील अल्पभूधारक शेतकरी गोपाल विश्वनाथ कुटे यांच्या एक एकरातील तर किरण परशराम साखरे यांच्या दीड एकरातील मालकीच्या असलेला पपईचा मळा वादळीवार्‍यात गारपिटमध्ये उद्ध्वस्त झाला आहे.

गारपिटीने रब्बी पिकांचे अतोनात नुकसान
 
कोरोना व निसर्गाच्या लहरीपणामुळे शेतकरी मेटाकुटीस आले आहेत. १९ मार्चला रात्री ८ वाजता अचानक अवकाळी पावसाने पुन्हा एकदा विजांच्या कडकडाटासह मेहकर तालुक्यामधील काही परिसर झोडपून काढले आहे. त्यामुळे रब्बीपिकांचे कांदा, भाजीपाला, फळांच्या पिकांसह नुकसान झाले आहे. शेतकरी गोपाल विश्वनाथ कुटे यांच्याकडे एकच एकर शेती असून त्या शेतात भारतीय स्टेट बँक ऑफ इंडिया डोणगांव शाखेचे ४० हजार रुपये कर्ज काढून शेतात तायवान पपईची १ हजार रोपाची जून महिन्यात लागवड केली होती. 

शेंदुर्जन मंडळांमध्ये कांदे, गहू हरभर्‍याचे नुकसान

कोरोनाच्या संकटात मार्केटमध्ये ठेकेदारच मिळत नसल्याने पपई विक्रीसाठी लांबणीत पडली होती. परंतु, अचानक १९ मार्चच्या रात्री विजांच्या कडकडाटासह गारपीटमध्ये, वादळी वार्‍यात या अल्पभूधारक शेतकरी गोपाल कुटे यांचा पपईचा मळा काही क्षणातच उद्ध्वस्त झाला आहे. उत्पन्नाअभावी घेतलेले बँकेचे व उसनवारीचे पैसे फेडायचे कसे असा प्रश्न या शेतकर्‍यांना सतावू लागला आहे. मेहनत घेऊन निसर्गापुढे हतबल होण्याची वेळ शेतकर्‍यावर आली आहे. त्यामुळे शेतकर्‍यांच्या डोळ्यांतून अश्रुचे बांध फुटले होते. हे शेतकरी शासन-प्रशासनाकडे मदतीची आर्तहाक देत आहेत.