अकोला : विधानसभा व लोकसभा निवडणुकीतील अपयशानंतर वंचित बहुजन आघाडीचे जिल्हा पातळीवरील नेते सैरभैर झाल्याचे दिसून येत आहे. अनेकांमध्ये अस्वस्थता बघायला मिळत असून अकोला जिल्ह्यात वंचितच्या काही प्रमुख चेहऱ्यांनी पक्षाला रामराम ठोकून दुसरीकडे आश्रय घेतला. अलीकडेच जिल्हा परिषद अध्यक्षा संध्याताई वाघोडे व माजी जि.प. सभापती प्रतिभाताई अवचार यांनी थेट राष्ट्रवादी काँग्रेसमध्ये प्रवेश केल्याने वंचितला मोठा धक्का मानला जात आहे. यामुळे अकोट व मुर्तिजापूर या वंचितच्या पारंपरिक प्रभाव असलेल्या गडांमध्ये पक्ष संघटन खिळखिळे झाल्याचे दिसते. तर वंचितमधील काही अन्य नेतेही आता काठावर उभे असून ते योग्य वाटा शोधत आहेत.