Akola Rain News : अकोला जिल्ह्यासाठी यलो अलर्ट जारी; नदीकाठच्या गावांना सर्तकतेचा इशारा

अकोला : जिल्ह्यात ३० सप्टेंबर रोजी जोरदार पाऊस होण्याची शक्यता हवामान विभागाच्या नागपूर येथील वेधशाळेने व्यक्त केली आहे. त्यामुळे नदी काठच्या गावांनी सतर्क रहावे, असा इशारा हवामान विभागाने दिला आहे.

खरीप हंगामातील मोठ्‍या खंडानंतर ५ सप्टेंबर रोजी रात्री पावसाने जिल्ह्यात सर्वदूर हजेरी लावली होती. कुठे रिमझिम तर कुठे मध्यम स्वरुपाचा पाऊस पडला होता. काही मिनिट झालेल्या या पावसाने कापूस आणि तूर उत्पादक शेतकऱ्यांना दिलासा मिळाला. मात्र, काढणीवर आलेल्या सोयाबीनला या पावसाचा कोणताही फायदा झाला नाही.

याआधी २७ जुलै रोजी जिल्ह्यात सार्वत्रिक पाऊस पडला होता. त्यानंतर एक-दोन ठिकाणी रिमझिम पाऊस झाला. संपूर्ण ऑगस्ट महिना कोरडाच गेला. श्रावण महिना लागल्यानंतरही पाऊस पडला नाही. त्यामुळे जिल्ह्यातील मोठ्या प्रमाणावर सोयाबीन पिकाला फटका बसला.

जवळपास सर्व मंडळात सोयाबीन उत्पादन घटल्याचा अंदाज आहे. दरम्यान २१ सप्टेंबर रोजी सुद्धा जिल्ह्यात जोरदार पाऊस झाला. त्यानंतर हवामान विभागाने २९ व ३० सप्टेंबर रोजी पावसाचा इशारा दिला असून जिल्ह्यासाठी यलो अलर्ट जारी केला आहे.