Farming Business Idea: खेकडा व्यवसायातून तरुणाने शोधली जगण्याची वाट

बाळापूर : शहर व तालुक्यात सध्या खेकड्यांना मागणी वाढली आहे. शहरातून जाणाऱ्या मन, महेश, भिकूंड नद्यांच्या किनारी, तसेच ओढ्याच्या किनारी खेकडे मोठ्या प्रमाणात मिळत आहेत. शेजारील पातूर तालुक्यातही खेकड्यांना मोठी मागणी आहे. (Crab Farming Business Idea)

नेमकं हेच गजानन सुरजुसे या युवकाने ओळखले आणि स्वतःच्या गावात खेकडा व्यवसाय सुरू केला असून या व्यवसायातून तो बऱ्यापैकी उत्पन्न मिळवत आहे. खेकडे आणि खवय्ये यांचे नाते पूर्वापार असून, खेकड्याची विशिष्ट चव आणि आरोग्याच्या दृष्टीने खेकडे महत्त्वाचे असल्याने मासळी बाजारात खेकड्यांना मोठ्या प्रमाणावर मागणी आहे.

नेमके हेच हेरून बाळापूर शहरातील गजानन सुरजुसे या उच्चशिक्षित तरुणाने खेकड्यांचा व्यवसाय करण्याचे ठरवले. गजानन सुरजुसे हा तरुण उच्चशिक्षित असून, नोकरीच्या मागे न लागता त्याने स्वतः उभारलेल्या व्यवसायातून जीवनाची आर्थिक वाट शोधली आहे.

मासेमारी करणे हा त्याच्या कुटुंबीयांचा पारंपरिक व्यवसाय आहे, मात्र खवय्यांची खेकड्यांना असलेली मागणी पाहूण या युवकाने स्वतःच्या गावात खेकडा व्यवसाय सुरू केला. त्याच्या खेकड्यांना मोठ्या प्रमाणावर मागणी होत आहे.

बाळापूर, पातूर तालुक्यात नद्यांचे पात्र आहे. यंदा या परिसरात सरासरीपेक्षा अधिक पाऊस पडला, पाण्याबरोबर खेकडे मोठ्या प्रमाणात वाहून आले आहेत. याचा फायदा गजानन या तरुणाला होत आहे. त्याच्या आर्थिक उत्पन्नाचे स्रोत सुधारला आहे.

दिवसभरात पाच ते सहा हजार रुपयांची विक्री

बाळापूर शहरातील बाजारात खेकडे विक्रीसाठी ठेवले जातात. दररोज दहा ते बारा किलोची विक्री होते. यामध्ये किलो मागे ६०० ते ७०० रुपयांची विक्री होते, तर आठवडी बाजाराच्या दिवशी अधिक विक्री होते. या व्यवसायातून दररोज पाच ते सहा हजार रुपयांचा निव्वळ नफा मिळत असल्याचे गजानन सांगतो.

मी पदवीधर असून, नोकरीच्या मागे न लागता व्यवसायाकडे वळलो. मासेमारी हा माझ्या कुटुंबीयांचा पारंपरिक व्यवसाय आहे. मासे विक्रीतून जास्त मिळकत होत नाही. खेकड्यांना जास्त मागणी असल्याने मी खेकडा व्यवसाय सुरू केला आहे. यातूनच मी जीवनाची वाट शोधली आहे व मला बऱ्यापैकी फायदा झाला आहे.

- गजानन सुरजुसे, खेकडा व्यवसायीक, बाळापूर.