नगर ः कोरोनाबाधितांच्या संख्येत शहरासह जिल्ह्यात दिवसेंदिवस वाढ होत आहे. अनेक सहकारी कार्यालयाच्या सहकाऱ्यांनादेखील कोरोनाचा संसर्ग झाल्याचे समोर येत आहे. जिल्हा पुरवठा विभागात देखील कोरोनाचा शिरकाव झाला असून दोन कर्मचाऱ्यांचे अहवाल पॉझिटिव्ह आल्याने खबरदारीचा उपाय म्हणून आठ दिवसांच्या कालावधीसाठी पुरवठा विभागाचे कार्यालयीन कामकाज बंद राहणार आहे. 

हेही वाचा ः कर्मचाऱ्यांच्या बदल्या व्हिडिओ कॉन्फरन्सद्वारे 

सुरवातीच्या काळात जिल्ह्यात कोरोनाच्या संक्रमणाला ब्रेक लागलेला होता. जूनपासून शहरासह जिल्ह्यात कोरोनाबाधितांची संख्या झपाट्याने वाढत आहे. शासकीय कार्यालयातील अधिकारी व कर्मचारी यांनादेखील कोरोनाची बाधा झाल्याचे स्पष्ट होत आहे. नगररचना, महापालिकेतील यापूर्वी काही कर्मचाऱ्यांना यापूर्वी कोरोना बाधा झाल्याचे स्पष्ट झाले. त्यातच गुरूवारी जिल्हा पुरवठा विभागातील दोन कर्मचाऱ्यांचे अहवाल पॉझिटिव्ह आले. 

अवश्‍य वाचा ः नगर जिल्ह्यात 22 जणांची कोरोनावर मात; 39 रुग्णांची वाढ 

दक्षतेचा उपाय म्हणून कार्यालयातील 30 अधिकारी-कर्मचाऱ्यांचे स्त्राव तपासले आहे. दोन बाधित कर्मचाऱ्यांव्यतिरिक्त इतरांचे अहवाल निगेटिव्ह आले. बाधित कर्मचाऱ्यांना आयसोलेशन विभागात दाखल करण्यात आले, तर निगेटिव्ह आलेल्या अधिकारी-कर्मचाऱ्यांना खबरदारी म्हणून होम क्वारंटाईन करण्यात आले आहे. त्यामुळे येत्या आठ दिवसांच्या कालावधीसाठी जिल्हा पुरवठा अधिकारी कार्यालय बंद राहणार आहे.