शिर्डी (जि. अहमदनगर) : जनतेचा प्रचंड पाठिंबा, प्रभावशाली व कणखर नेता, अशी जगभर ओळख व देशाला वैभव प्राप्त करून देण्यासाठी आयुष्य समर्पित करणारे व्यक्तिमत्त्व म्हणून पंतप्रधान नरेंद्र मोदींची प्रतिमा निर्माण झाली आहे. जगभरातील लोकप्रिय नेत्यांत त्यांचे स्थान वरचे आहे, असे प्रतिपादन भाजपचे ज्येष्ठ नेते आमदार राधाकृष्ण विखे पाटील यांनी केले.

मोदी यांच्‍या वाढदिवसाचे औचित्‍य साधून, भाजपतर्फे सेवा सप्ताहाचा प्रारंभ विखे पाटील यांच्या उपस्थितीत करण्यात आला. त्यावेळी ते बोलत होते. माजी मंत्री अण्‍णासाहेब म्‍हस्‍के पाटील, भाजपचे उत्तर नगर जिल्‍हाध्‍यक्ष राजेंद्र गोंदकर, नगराध्‍यक्ष शिवाजी गोंदकर, उपनगराध्‍यक्ष हरिश्‍चंद्र कोते, शिर्डीचे माजी नगराध्‍यक्ष कैलास कोते, डॉ. राजेंद्र पिपाडा, गणेश कारखान्‍याचे अध्यक्ष मुकुंद सदाफळ, राहात्याचे माजी नगराध्यक्ष डॉ. के. वाय. गाडेकर, कैलास सदाफळ, साहेबराव निधाने, नितीन कापसे, डॉ. गोकुळ घोगरे व डॉ. स्वाती म्हस्के आदी यावेळी उपस्थित होते.

यावेळी लोणी बुद्रुक, राहाता ग्रामीण रुग्‍णालय, शिर्डी येथील साईबाबा रुग्‍णालय व प्रवरा ग्रामीण रुग्‍णालयातील रुग्‍णांना फळांचे वाटप करण्यात आले. शिर्डी येथील सुपर स्‍पेशालिटी रुग्‍णालयात भारतीय जनता युवा मोर्चाच्‍या वतीने रक्‍तदान शिबिराचे आयोजन करण्‍यात आले. शिबिराचा प्रारंभ विखे पाटील यांच्या हस्ते झाला. ते म्हणाले, या सेवा व समर्पण सप्ताहानिमित्त केंद्र सरकारच्‍या विविध योजनांचा लाभ मिळालेल्‍या लाभार्थींना सन्मानपत्र दिले जाईल.