अहमदनगर : गावठी पिस्तूल विकण्यासाठी आलेल्या औरंगाबादच्या आरोपीस नगरच्या स्थानिक गुन्हे अन्वेषण शाखेने नगर-औरंगाबाद महामार्गावर पांढरीपूल घाट (इमामपूर, ता. नगर) शिवारात अटक केली. त्याच्याकडून एक गावठी पिस्तूल आणि दोन जीवंत काडतुसे हस्तगत करण्यात आले आहेत. नगर-औरंगाबाद महामार्गावर पांढरीपूल घाटात एक जण गावठी पिस्तूल विकण्यासाठी येणार आहे, अशी माहिती पोलिसांना मिळाली.

स्थानिक गुन्हे अन्वेषण शाखेचे पोलिस निरीक्षक अनिल कटके यांच्या मार्गदर्शनाखाली सहाय्यक निरीक्षक सोमनाथ दिवटे आणि गणेश इंगळे यांच्या नेतृत्वाखालील पथकाने पांढरीपुलाजवळील हॉटेल लेमन ट्री जवळ दबा धरून बसले. या ठिकाणी संशयित व्यक्‍ती आल्यावर त्यास पोलिस पथकाने आपली ओळख सांगून पंचासमक्ष अंगझडती घेतली. त्याच्याकडे एक गावठी पिस्तूल आणि दोन जीवंत काडतुसे असा 30 हजार 600 रुपये किंमतीचा मुद्देमाल आढळून आला.

त्याने आपले नाव सागर महेंद्र त्रिभुवन (वय 20, रा. वडगाव कोल्हाटी, ता. जि. औरंगाबाद) असे सांगितले. पोलिस हेड विजयकुमार बाळासाहेब वेठेकर यांच्या फिर्यादीवरून एमआयडीसी पोलिस ठाण्यात भारतीय हत्यार कायद्यानुसार गुन्हा दाखल करण्यात आला आहे. सागर त्रिभुवन याच्याविरुद्ध औरंगाबाद जिल्ह्यातील एमआयडीसी पोलिस ठाण्यात जबर दुखापतीचा एक गुन्हा दाखल आहे.