नवी दिल्ली : कतार विमानात 11 महिन्यांच्या बालकाला श्वसनाचा त्रास जाणवू लागल्याने त्याचा मृत्यू झाला. हे बालक त्याच्या कुटुंबियांसह विमानातून प्रवास करत होते. कतार विमानाच्या डोहा-हैदराबाद विमानात ही दुर्घटना आज (बुधवार) घडली. 

अर्णव वर्मा असे त्या बालकाचे नाव असून, विमानप्रवासादरम्यान या बालकाचा मृत्यू झाला. याबाबत हैदरबाद विमानतळाच्या अधिकाऱ्यांनी सांगितले, की अर्णव वर्मा आणि त्याचे पालक डोहा येथून विमान क्रमांक क्यूआर-500 मधून प्रवास करत होते. ज्यावेळी या बालकाला विमानात श्वसनाचा त्रास जाणवू लागल्याने त्याला तातडीने हैदराबाद येथील अपोलो रुग्णालयात दाखल करण्यात आले. मात्र, त्या बालकाची तपासणी केल्यानंतर डॉक्टरांनी त्याला मृत घोषित करण्यात आले.

दरम्यान, ''विमानातील एक बालक हैदराबाद आंतरराष्ट्रीय विमानतळावर आज सकाळी दगावल्याची बातमी समजताच आम्ही सर्व दु:खी आहोत. आम्ही त्या बालकाच्या कुटुंबियांचे सांत्वन करतो'', अशा शब्दांत कतार विमानतळाकडून शोक व्यक्त करण्यात आला.