आसामचे मुख्यमंत्री हिमंता बिस्वा सरमा (Assam CM Himanta Biswa Sarma) यांनी महिलांबाबत एक वादग्रस्त विधान केलंय. 22 ते 30 वर्षाच्या कालावधीत महिलांनी (Women) योग्य वयात 'आई' बनलं पाहिजे, असं त्यांनी म्हटलंय. मुख्यमंत्र्यांच्या या विधानावरून सध्या वाद सुरु झालाय.

सरमांच्या वक्तव्यामुळं ते नव्या वादात सापडले आहेत. मुख्यमंत्र्यांवर आता टीका होऊ लागलीये. गुवाहाटी (Guwahati) इथं एका कार्यक्रमात बोलताना मुख्यमंत्री म्हणाले, महिला 22 ते 30 वयोगटात असताना माता बनणं चांगलं आहे. जर महिलांनी असं केलं तर ते केवळ त्यांच्यासाठीच नाही तर मुलासाठी देखील खूप चांगलं होईल. इतकंच नाही तर ज्या महिलांची वये 30 होतील त्या महिलांनी लवकर लग्न करावं, असा सल्लाही त्यांनी दिला.

नवजात बालकं आणि गर्भवती महिलांचा मृत्यूदर कमी करण्यावर मुख्यमंत्री बोलत होते. या दिशेनं सरकारनं उचललेल्या पावलांचं मुख्यमंत्र्यांनी कौतुक केलं. लवकर लग्न आणि योग्य वयात गर्भवती न होणं हे यामागचं प्रमुख कारण असल्याचंही त्यांनी सांगितलं. अल्पवयीन मुलांचं लग्न लावणाऱ्यांवर आम्ही कायदेशीर कारवाई करत आहोत. मी महिलांना सांगू इच्छितो की 30 वर्षांच्या आधी आई व्हा, त्यानंतर महिलांना समस्यांना सामोरं जावं लागतं, असं मुख्यमंत्र्यांनी स्पष्ट केलं.

CM हिमंता पुढं म्हणाले, तरुण वयात महिला माता बनल्याबद्दल सतत चर्चा होत असते. देवानं हे शरीर अशा प्रकारे बनवलं आहे की, प्रत्येक गोष्टीचं योग्य वय आहे. गेल्या आठवड्यात मंत्रिमंडळानं निर्णय घेतला होता की, 14 वर्षांपेक्षा कमी वयाच्या मुलींशी लग्न करणाऱ्या पुरुषांवर POCSO कायद्याअंतर्गत कारवाई केली जाईल. 14-18 वयोगटातील मुलींशी विवाह करणाऱ्या पुरुषांवर बालविवाह कायद्यांतर्गत कारवाई केली जाईल, असं त्यांनी सांगितलं.