कॅश घोटाळ्याप्रकरणी (Cash Scam) काँग्रेसमधून (Congress MLA) निलंबित करण्यात आलेल्या डॉ. इरफान अन्सारी, नमन विक्सल कोंगाडी आणि राजेश कच्छप या तीन आमदारांना विधानसभा अध्यक्ष रवींद्र नाथ महतो यांनी नोटीस बजावलीय. काँग्रेस विधिमंडळ पक्षाचे नेते आलमगीर आलम (Alamgir Alam Jharkhand) यांनी तिघांचीही आमदारकी रद्द करण्याच्या शिफारसीवरून ही नोटीस पाठवण्यात आलीय. त्यांना 1 सप्टेंबरपर्यंत मेल किंवा वकिलामार्फत आपली बाजू मांडण्यास सांगण्यात आलंय.

या तिघांनाही कोलकात्यातच नोटिसा मिळाल्या आहेत. आलम यांनी आपल्या तक्रार पत्रात म्हटलंय की, या तिघांनी इतर तीन आमदार कुमार जयमंगल, भूषण बाडा आणि शिल्पी नेहा टिर्की यांना सरकार पाडण्यासाठी ऑफर दिली होती. त्यासाठी मंत्रिपद आणि 10-10 कोटी देऊ केलं होतं. याबाबत या आमदारांनी लेखी तक्रार केलीय.

त्याआधारे डॉ. इरफान, नमन विक्सल व राजेश यांचं विधानसभेचं सदस्यत्व रद्द करण्याची कारवाई करावी. मात्र, या तीन निलंबित आमदारांनी नोटीस देण्यात आलेला आरोप चुकीचा असल्याचं म्हटलंय. त्यांच्यावर लावण्यात आलेले आरोपही निराधार असल्याचं सांगितलंय. हे तिघंही 1 सप्टेंबर रोजी सभापतींना उत्तर देणार असल्याचं कळतंय. या तिन्ही आमदारांनी शुक्रवारी काँग्रेसच्या शिस्तपालन समितीकडं नोटीसचं उत्तर पाठवलंय. यासोबतच काँग्रेसचे झारखंड प्रभारी, संघटना प्रभारी आणि विधिमंडळ पक्षाचे नेते यांनाही उत्तर पाठवण्यात आलंय. त्यांना कोलकाता इथं 48 लाख रुपयांसह अटक करण्यात आली होती.