नवी दिल्ली : पंजाब नॅशनल बँक गैरव्यवहार आणि राफेल करारावरून काँग्रेस अध्यक्ष राहुल गांधी यांनी पंतप्रधान नरेंद्र मोदी यांच्यावर निशाणा साधला. ''देशात झालेला पंजाब नॅशनल बँक गैरव्यवहार आणि राफेल करारावर पंतप्रधान मोदी कोणतेही भाष्य का करत नाहीत, ते गप्प का आहेत'', असा सवाल राहुल गांधींनी यावेळी केला. 

नुकत्याच झालेल्या पीएनबी गैरव्यवहार आणि राफेल करारावरून पंतप्रधान मोदींवर विरोधकांकडून सातत्याने टीका केली जात आहे. पीएनबी आणि राफेल करारावर मोदींनी बोलायला हवे. ते गप्प का आहेत. तसेच यावेळी राहुल गांधींनी पंतप्रधानांच्या 'मन की बात' या कार्यक्रमावरही टीकास्त्र सोडले. ते म्हणाले, ''पंतप्रधान मोदी ऑल इंडिया रेडिओवर भाषण करतात. मात्र, हिरे व्यावसायिक नीरव मोदी आणि राफेल गैरव्यवहारावर काहीही बोलत नाहीत.

मोदीजी मागील महिन्यात तुम्ही माझ्या सुचनांकडे दुर्लक्ष केले. तुम्ही यावर काहीच बोलत नाही. नीरव मोदी यांनी 22000 कोटींची लूट केली तर 58000 कोटींचा राफेल करारात गैरव्यवहार झाला, या सर्वांवर ते गप्प का आहेत, असेही ते म्हणाले.