पणजी (गोवा) - मजलावाडा - हरमल येथील एकमजली बंगल्यावर गुन्हे अन्वेषण विभागाच्या क्राईम ब्रँचने छापा टाकून वसईतील दलाल मैना नायक ऊर्फ तब्बसूम मुसैद अली (35) हिला वेश्या व्यवसाय चालवित असल्याप्रकरणी अटक केली. फ्लॅटवरील तिघा तरुणींची सुटका करून त्यांची रवानगी मेरशी येथील महिला सुधारगृहात करण्यात आली आहे. 

हरमल येथील एका बंगल्यामध्ये वेश्या व्यवसायासाठी परराज्यातील तरुणींना आणून ठेवण्यात आले अाहे व तेथेच देहविक्रीचा प्रकार सुरू असल्याची माहिती क्राईम ब्रँचचे निरीक्षक विश्वेस कर्पे यांना मिळाली होती. त्यानुसार काल 13 नोव्हेंबर रोजी संध्याकाळी साडेसहाच्या सुमारास कर्पे यांच्या नेतृत्वाखाली क्राईम ब्रँचने बोगस ग्राहक पाठवून हा छापा टाकला. त्यावेळी फ्लॅटमध्ये वेश्या दलाल मैना ऊर्फ तब्बसूम व तीन तरुणी होत्या. या तरुणी मुंबईतील सायन, मुंब्रा व अहमदनगर येथील आहेत. नोकरीचे आमिष दाखवून त्याना देहविक्री करण्यास प्रवृत्त करण्यात येत होते व संशयित त्यांच्या मिळकतीवर हा व्यवसाय करत असल्याचा गुन्हा दाखल करण्यात आला आहे. आज संध्याकाळी संशयित दलाल मैना हिला पेडणे न्यायालयात पोलिस कोठडीसाठी उभे केले जाणार आहे. पोलिस निरीक्षक विश्वेश कर्पे अधिक तपास करत आहेत.