इंदौर : पनामा पेपर्स लिकप्रकरणात काँग्रेस अध्यक्ष राहुल गांधींनी मध्यप्रदेशचे मुख्यमंत्री शिवराजसिंह चौहान यांच्या मुलाचे नाव घेतले होते. राहुल गांधींनी शिवराजसिंह यांच्या मुलाचे नाव घेतल्यानंतर शिवराजसिंह यांनी राहुल गांधींवर कायदेशीर कारवाई करण्याचा इशारा दिला होता. या इशाऱ्यानंतर राहुल गांधींनी आपली 'चूक' स्वीकारली असून, आपण यामध्ये 'कन्फ्यूज्ड' झालो असल्याचे सांगितले.  

"व्यापमंपासून (व्यावसायिक परीक्षा मंडळ) पनामा पेपर्सपर्यंत मी आणि माझ्या कुटुंबियांवर तुमच्याकडून चुकीचे आरोप केले जात आहेत. गांधींनी जे आरोप केले ते सर्व खोटे आहेत. या आरोपांमुळे माझ्या प्रतिमेला धक्का पोचला आहे. त्यामुळे मी उद्या अब्रुनुकसानीचा खटला दाखल करणार आहे'', असा इशारा चौहान यांनी दिला होता. त्यानंतर राहुल गांधींनी आपली 'चूक' स्वीकारली. आपण व्यापमं आणि पनामा यामध्ये 'कन्फ्यूज्ड' झालो.

दरम्यान, मध्यप्रदेशातील आगामी विधानसभा निवडणुकीच्या पार्श्वभूमीवर राहुल गांधी मध्यप्रदेशच्या दोन दिवसीय दौऱ्यावर आहेत.