नवी दिल्ली : 'एअर इंडिया' या आंतरराष्ट्रीय विमानसेवा देणाऱ्या कंपनीचे जगभरातले सर्व्हर आज (ता. 27) पाच तासांसाठी  डाऊन झाले होते. कंपनीच्या मुख्य सर्व्हरमध्ये बिघाड झाल्याने त्याचा परिणाम जगभरातील इतर सर्व्हरवर झाला व त्यामुळे विमानसेवा विस्कळीत झाली होती. तर आता या तांत्रिक अडचणी दूर करून पुन्हा एकदा सर्व सर्व्हर सुरू झाल्याचे एअर इंडियाच्या अधिकाऱ्यांनी सांगितले.  

पहाटे साडेतीनपासून मुख्य सर्व्हर डाऊन झाला होता. यामुळे भारतासह परदेशातही प्रवाशांना चेक इन करण्यास अडचणी आल्या. यामुळे शेकडो प्रवाशांना अडचणीचा सामना करावा लागला व विमानतळावर खोळंबून राहावे. प्रवाशांनी विमानतळावरील गर्दीचे फोटो व व्हिडिओ लगेचच सोशल मीडियावर व्हायरल केले. 

एअर इंडियाला सॉफ्टवेअर सेवा देणाऱ्या SITA या कंपनीने तांत्रिक बिघाड दूर करून पुन्हा एकदा ही सेवा सुरळीत केली आहे. जवळपास 2000 प्रवासी या बिघाडामुळे मुंबई विमानतळावर अडकून पडले होते, असे प्रवाशांनी सांगितले.