रशिया आणि युक्रेनमध्ये सुरू असलेल्या युद्धामुळे भारतासह जगभरात कच्च्या तेलाच्या व अनेक गोष्टींच्या किमती वाढल्या आहेत. मात्र, युद्धाचा फायदा भारतीय शेतकऱ्यांना (Farmers) होत आहे. युद्धामुळे जगभरात गव्हाचे भाव सातत्याने वाढत आहे. आता त्याचा परिणाम भारतातही दिसून येत आहे. केंद्र सरकारकडून गव्हासाठी किमान आधारभूत किंमत २,०१५ रुपये प्रति क्विंटल आहे. परंतु, बाजारात त्याची किंमत २,२५० ते २,३०० रुपये आहे. सुरुवातीच्या हंगामातच गव्हाचे भाव सरकारी दरापेक्षा जास्त असल्याचे बऱ्याच काळानंतर पाहायला मिळत आहे.

यावेळी पंजाब सरकार १० लाख टनांपेक्षा कमी गव्हाची (Wheat) खरेदी करीत आहे. युक्रेन आणि रशिया यांच्यातील युद्धामुळे शेतकरी गव्हाच्या पिकाचा काही भाग वाचवतील जेणेकरून भविष्यात ते खाजगी व्यापाऱ्यांना विकू शकतील, असा यामागील सरकारचा विचार आहे. खरे तर युक्रेन युद्धामुळे जगभरात गव्हाचा तुटवडा निर्माण झाला आहे. शिकागोमधील फ्युचर्स ट्रेडिंगमध्येही गव्हाच्या किमती ४० टक्क्यांपर्यंत वाढल्या आहेत.

रशिया आणि युक्रेन (Ukraine) हे गव्हाचे प्रमुख निर्यातदार आहेत आणि युद्धामुळे निर्यात ठप्प झाली आहे. अशा स्थितीत मागणी वाढली आहे आणि भारतातही त्याचा परिणाम झाल्याने किमतींनी एमएसपी ओलांडली आहे. सध्या गिरणी मालक मंडईतून गहू घेत आहेत. परंतु, नवीन साठा आल्यानंतर परदेशी खरेदीदारही मंडईत जाऊ शकतात आणि मोठ्या प्रमाणात गव्हाची खरेदी होऊ शकते, असे कमिशन एजंटने सांगितले.

शेतकरी पिके चांगल्या भावात विकतील?

भारतात दरवर्षी गव्हाची (Wheat) किमान आधारभूत किंमत सरकारद्वारे निश्चित केली जाते. साधारणतः: खासगी व्यापारी यापेक्षा कमी दराने शेतकऱ्यांकडून गहू खरेदी करीत आहेत. त्यावरही प्रश्न उपस्थित झाले आहेत. मात्र, यावेळी युक्रेन आणि रशिया यांच्यातील युद्धाने परिस्थिती बदलली आहे. शेतकरी (Farmers) आपली पिके चांगल्या भावात विकतील अशी आशा आहे.