नवी दिल्ली : किरकोळनंतर आता घाऊक महागाईही (Wholesale Inflation) थोडी कमी झाली आहे. कच्च्या आणि खाद्यतेलांसह जागतिक कमोडिटीच्या किमतींमध्ये काही प्रमाणात घट झाल्याने भारताची घाऊक महागाई (WPI) जूनमध्ये १५.१८ टक्के पर्यंत कमी झाली. परिस्थिती सुधारली आहे. परंतु, हे आकडे अजूनही ३० वर्षांतील सर्वोच्च पातळीवर आहे. त्याचवेळी घाऊक महागाईचा आकडा दुहेरी आकड्यांमध्ये आल्याचा हा सलग १५वा महिना आहे. (Wholesale inflation Marathi News)

मे महिन्यातही घाऊक महागाई दर १५.८८ टक्के या तीन दशकांच्या उच्चांकावर होता. या संदर्भात जूनमध्ये थोडीशी घसरण झाली आहे. जर आपण जून २०२१ शी तुलना केली तर घाऊक महागाई (Wholesale Inflation) दर वाढला आहे. जून २०२१ मध्ये घाऊक महागाई १२.०७ टक्के होती.

कोणाच्या किमतीत वाढ

जून २०२२ मध्ये खाद्यपदार्थांच्या (Food) किमती एका वर्षापूर्वीच्या तुलनेत १४.३९ टक्के वाढल्या आहेत. भाज्यांच्या किमतीत ५६.७५ टक्के वाढ झाली आहे. तर बटाटे आणि फळांमध्ये अनुक्रमे ३९.३८ टक्के आणि २०.३३ टक्के वाढ झाली आहे. त्याचप्रमाणे इंधन (Fuel) आणि विजेच्या दरात ४०.३८ टक्के वाढ झाली आहे. जूनमध्ये क्रूड पेट्रोलियम आणि नैसर्गिक वायूची महागाई ७७.२९ टक्के होती.

किरकोळ चलनवाढीचा डेटा

जूनमध्ये किरकोळ चलनवाढीचा दर किरकोळ घसरून ७.०१ टक्क्यांवर आला. तो मेमध्ये ७.०४ टक्के होता. त्याचवेळी एप्रिलमध्ये किरकोळ महागाईचा (Inflation) दर ७.७९ टक्के होता. ग्राहक किंमत निर्देशांकावर आधारित चलनवाढ कमी असूनही, ती सलग सहाव्या महिन्यात आरबीआयच्या समाधानकारक पातळीच्या वर राहिली आहे.