रामपूरहट (पश्‍चिम बंगाल) ः तोंडावाटे घेतलेले अन्न हे पोटात जाऊन भूक शांत होते. म्हणूनच उदरभरण करणे पहिले कार्य मानले जाते. पण, या पोटात अन्नाशिवाय इतर काही साठू शकते का? तर त्याचे उत्तर हो, असे आता द्यावे लागेल. पश्‍चिम बंगालमधील बीरभूम जिल्ह्यातील सरकारी रुग्णालयात एका महिलेच्या पोटातून दीड किलो दागिने आणि नाणी बाहेर काढण्यात आली.

रामपूरहट सरकारी वैद्यकीय महाविद्यालय आणि रुग्णालयात बुधवारी (ता.24) झालेल्या शस्त्रक्रियेत हा खजिना सव्वीस वर्षांच्या महिलेच्या पोटातून बाहेर आला. संबंधित महिला मानसिक रुग्ण आहे. तिच्यावर शस्त्रक्रिया केल्यानंतर पाच व दहा रुपयांची 90 नाणी, साखळी, नाकातील चमकी, कानातील डूल, बांगड्या, पैंजण असे दागिने आणि घड्याळे पोटात आढळली, अशी माहिती रुग्णालयाच्या शस्त्रक्रिया विभागाचे प्रमुख सिद्धार्थ विश्‍वास यांनी सांगितले. बहुतेक दागिने हे तांबे, पितळाचे असून, काही सोन्याचेही आहेत. 

या महिलेच्या आईने दिलेल्या माहितीनुसार मारग्राम येथील त्यांच्या घरातून दागिने हरविले असल्याचे निदर्शनास आल्यानंतर मुलीकडे चौकशी करण्यात आली. पण, जेव्हा-जेव्हा तिला याबद्दल विचाले जात असे तेव्हा ती रडू लागे. ""माझी मुलगी मानसिक रुग्ण आहे. काही दिवसांपासून जेवण झाल्यानंतर ती उलट्या करीत असे. तिच्या भावाच्या दुकानातून तिला नाणी मिळाली होती. आम्ही तिच्यावर लक्ष ठेवून होतो. दागिने व नाणी गिळली होती.

गेल्या दोन महिन्यांपासून ती आजारी होती. तिला आम्ही अनेक खासगी दवाखान्यांत नेले. तिच्यावर औषधोपचार सुरू असले, तरी प्रकृतीत सुधारणा होत नव्हती. नंतर तिला सरकारी रुग्णालयात आणले. तिथे एक आठवडा चाचण्या घेतल्यानंतर डॉक्‍टरांनी तिच्यावर शस्त्रक्रिया केली,'' अशी माहिती या मुलीच्या आईने दिली.