लखनौ : केंद्र सरकारने अग्निपथ योजनेची (Agneepath Scheme) घोषणा केल्यापासून विरोध सुरू झाला आहे. योजनेच्या माध्यमातून तरुणांच्या भविष्याशी खेळले जाणार आहे. यामुळे लष्कराची प्रतिष्ठाही कमी होणार असल्याचे विरोधकांचे म्हणणे आहे. अशात कालपासून योजनेच्या विरोधात केल्या जाणाऱ्या आंदोलनाला हिंसक वळण लागले आहे. यामुळेच उत्तर प्रदेश सरकारने मोठी घोषणा केली आहे. (Yogi governments big announcement for Agneepath Scheme)

केंद्र सरकारने सैन्यात चार वर्षांच्या भरतीसाठी जाहीर केलेल्या अग्निपथ योजनेला तरुणांकडून चांगलाच विरोध केला जात आहे. गुरुवारी सकाळपासून विरोध वाढला आहे. बिहारपासून हरयाणापर्यंतच्या आंदोलनाला हिंसक वळण लागले आहे. कुठे गाड्या जाळल्या तर काही ठिकाणी ट्रेनचे रूळ उखडले.

अग्निपथ योजनेच्या विरोधात देशभरातील युवकांचे निदर्शने पाहता मुख्यमंत्री योगी आदित्यनाथ (Yogi adityanath) यांनी उत्तर प्रदेश सरकार, पोलिस आणि इतर सेवांमध्ये अग्निवीरांना प्राधान्य (Preference) देणार असल्याची घोषणा केली आहे.

मुख्यमंत्री योगी आदित्यनाथ (Yogi adityanath) यांनी गुरुवारी ट्विट करून तरुणांनी कोणाच्याही सांगण्यात येऊ नये असे म्हटले आहे. अग्निपथ योजना तरुणांच्या जीवनाला नवे आयाम देण्याबरोबरच भविष्याला सुवर्ण आधार देईल, असेही ते म्हणाले.

तरुण मित्रांनो, अग्निपथ योजना (Agneepath Scheme) तुमच्या आयुष्याला नवे आयाम देईल तसेच भविष्याला सोनेरी आधार देईल. कोणाच्याही सांगण्यात येऊ नका. देशाची सेवा करण्याचा निश्चय करणारे आमचे अग्निवीर राष्ट्राचा अमूल्य निधी असेल आणि उत्तर प्रदेश सरकार अग्निवीरांना पोलिस आणि इतर सेवांमध्ये प्राधान्य देईल, असे योगी आदित्यनाथ ट्विटमध्ये म्हणाले.