इस्लामाबाद : लष्कर-ए-तोयबा या दहशतवादी संघटनेचा मी सर्वात मोठा समर्थक आहे. या संघटनेलाही मी आवडतो, असे वक्तव्य पाकिस्तानचे माजी लष्करप्रमुख परवेझ मुशर्रफ यांनी केले. तसेच त्यांनी जमात-उद-दवाह आणि लष्कर-ए-तोयबा या दहशतवादी संघटनांकडून केल्या जाणाऱ्या कारवायांचे समर्थनही केले.

पाकिस्तानमधील एका वृत्तवाहिनीशी बोलताना त्यांनी हे वक्तव्य केले. जमात-उद-दवाह आणि लष्कर-ए-तोयबा या दहशतवादी संघटनांकडून जगभरात दहशत माजवण्याचे काम केले जात आहे. त्यामुळे अशा दहशतवादी संघटनांचा जगभरातून निषेध केला जात आहे. मात्र, मुशर्रफ यांनी अशा दहशतवादी संघटनांचे समर्थन केले आहे. मी लष्कर-ए-तोयबाचा समर्थक असून, या संघटनेलाही मी आवडतो, असे ते म्हणाले. 

यावेळी मुशर्रफ यांना हाफिज सईदच्या कारवायांचे समर्थन करता का, असा सवाल केला गेला. यावर ते म्हणाले, हाफिझ सईदचा काश्मीरमधील कारवायांमध्ये सहभाग आहे आणि मी त्या कारवायांचे समर्थन करतो, असे त्यांनी सांगितले.  

दरम्यान, पाकिस्तानच्या न्यायालयाने मुंबईवरील दहशतवादी हल्ल्याचा मुख्य सूत्रधार आणि जमात-उद-दवाह या दहशतवादी संघटनेचा म्होरक्या हाफिज सईद याची काही दिवसांपूर्वी पाकिस्तानच्या नजरकैदतून सुटका केली होती. त्यानंतर आता मुशर्रफ यांनी हे वक्तव्य केले आहे.