नाशिक : कंबरेचं दुखणं, स्लिप डिस्क आणि सायटिकाच्या दुखणं आपल्याला त्रास देतात. तर योगाचे एक असे आसन आहे ज्यामुळे आपल्याला आराम मिळू शकतो. या आसनामुळे विशेष करून फायदा होऊ शकतो. कंबर दुखण्यामुळे शरीरामध्ये आलेलं आखडलेपणा दूर होतो. जांघ, पार्श्वभाग, पाठीचा कणा आणि कंबर यात आलेला अवघडपणा दूर करून त्यांना मजबूत बनवतं. कंबरेची अतिरिक्त चरबी घालवून कंबरेचा आकार कमी करून ती आकर्षक बनवण्यास मदत होते. किडनी, यकृत, आतडी, स्वादुपिंड, मूत्राशय या सर्व गोष्टींवर दाब येतो, तसंच त्या खेचल्या जात असल्यानं त्यांचं कार्य सुरळीत चालण्यास मदत होते. बद्धकोष्ठता, गॅस, अपचन, लठ्ठपणा या विकारांमध्येही उपयुक्त आहे. आणि ते आसन म्हणजे लाभदायी 'कटिचक्रासन'

'कटिचक्रासन' कसे करावे?
एक-एक करून दोन्ही पाय गुडघ्यातून वाकवा. या क्रियेत दोन्ही गुडघे एकमेकांना चिकटलेले राहतील. आता दोन्ही हात खांद्यांना समांतर असे ठेवा. हाताचे तळवे वरच्या बाजूला राहतील. आता श्वास सोडत दोन्ही गुडघे एकत्र डाव्या बाजूच्या जमिनीच्या दिशेनं घेऊन जा. त्याचबरोबर डोकं उजव्या बाजूला फिरवा. गुडघे जितक्या सहजपणे जमिनीपर्यंत घेऊन जाऊ शकता तेवढं घेऊन जा. घोट्यावर घोटा आणि गुडघ्यावर गुडघा येईल. आता श्वासोच्छ्वास सामान्य ठेवून काही वेळ या स्थितीमध्ये थांबा. जितका वेळ शक्य आहे तितका वेळ थांबल्यानंतर एक एक गुडघा उचला. डोकंही सरळ करा. अशा प्रकारे दुसऱ्या बाजूलाही करा. दोन्ही पायांत थोडं अंतर ठेवूनही हे आसन करता येऊ शकतं. दोन्ही बाजूंनी तीन-तीन वेळा ही क्रिया करा.

काळजी घेणे आवश्यक

योगगुरू म्हणतात, कोणत्याही प्रकारची घाई किंवा जबरदस्ती न करता पायांना जमिनीच्या दिशेनं हळूहळू घेऊन जा. पण पूर्वस्थितीला येताना एक-एक करून गुडघे वर उचला. कारण एकाच वेळी दोन्ही गुडघे उचलायला गेलात तर त्यामुळे कंबरेवर थोडा जास्त जोर येण्याची शक्यता असते.