Jalgaon Crime News : शिरसोली शिवारात सालदारकी करणाऱ्या कुटुंबातील पंधरा वर्षीय मुलीचे दोन वर्षांपूर्वी अपहरण झाले होते. याबाबत एमआयडीसी पोलिसांत गुन्हा दाखल झाला. मात्र, २२ महिने पोलिस संशयित व पीडितेला शोधू शकले नाहीत.

अखेर शुक्रवारी (ता. २८) मध्यरात्री एमआयडीसी पोलिसांनी जामनेर शिवारातून संशयित सुनील बारेला याला अटक केली. न्यायालयाने त्याची पोलिस कोठडीत रवानगी केली. (15 year old girl kidnapped and married jalgaon crime news)

शिरसोली येथील तुकाराम बारी यांच्याकडे सालदार म्हणून आदिवासी कुटुंब वास्तव्यास होते. या कुटुंबातील अल्पवयीन मुलीस ९ ऑक्टोबर २०२१ ला संशयिताने पळवून नेले. या प्रकरणी एमआयडीसी पोलिसांत अपहरणाचा गुन्हा दाखल झाला.

गेली दोन वर्षे पीडिता व संशयित पोलिसांना मिळून आले नाहीत. मिळालेल्या माहितीवरून पोलिस निरीक्षक जयपाल हिरे यांच्या पथकाने तोंडापूर (ता. जामनेर) येथील एका शेतशिवारातून संशयित सुनील दलू बारेला (वय २४) याला अटक केली.

हेही वाचा : Credit Card फसवणूक....काय घ्याल काळजी?

दरम्यान, संशयित सुनील दलू बारेला याने पीडितेशी मंदिरात विवाह करून घेतला व तो जामनेर तालुक्यात सालदार म्हणून काम करीत होता. पीडिता व संशयित यांना ११ महिन्यांचे बाळ असून, दोन वर्षांनंतर एमआयडीसी पोलिसांनी पित्याला अटक केली.

बालिका अत्याचारातून बाळाचा जन्म झाल्यानंतर दाखल गुन्ह्यात अतिरिक्त कलम वाढविण्यात आले. संशयिताला न्यायाधीश केंद्रे यांच्या न्यायालयाने १ ऑगस्टपर्यंत पोलिस कोठडी सुनावली. सरकार पक्षातर्फे ॲड. सुरेंद्र काबरा यांनी काम पाहिले.