जळगाव : कोरोनाच्या (Corona) चौथ्या लाटेच्या (Fourth wave) उंबरठ्यावर राज्यात रुग्णसंख्या वाढत असताना, जळगाव जिल्ह्यातही रुग्ण वाढू लागले आहेत. गेल्या तीन-चार दिवसांत सक्रिय रुग्णांची संख्या २५ वर पोचली आहे.

जळगाव जिल्ह्यात गेल्या आठवडाभरापासून कोरोनाचे रुग्ण पुन्हा आढळून येत आहेत. तीन दिवसांपासून ही संख्या चार, पाचपेक्षा जास्त आढळून येत आहे. मंगळवारी (ता. २१) एकाच दिवसात ७ रुग्ण समोर आल्यानंतर बुधवार (ता. २२)च्या अहवालातही नव्या ८ रुग्णांची नोंद झाली. त्यात जळगाव शहरात १, जळगाव ग्रामीणला १, भुसावळ व चोपडा तालुक्यात प्रत्येकी २, धरणगावला १, असे ८ रुग्ण समोर आले. तर दिवसभरात ७ रुग्ण बरेही झाले. त्यामुळे सध्या सक्रिय रुग्णसंख्या २५ झाली आहे.

सर्व रुग्ण घरीच

गेल्या आठवडाभरात दररोज रुग्ण समोर येत असले, तरी या रुग्णांमध्ये अगदीच सौम्य लक्षणे आहेत. सद्य:स्थितीत सक्रिय असलेले सर्व २५ रुग्ण घरीच विलगीकरणात असून, उपचार घेत आहेत. एकही रुग्ण हॉस्पिटलमध्ये दाखल नाही. त्यामुळे चिंतेचे कारण नसले, तरी नागरिकांनी काळजी घ्यावी, असे आवाहन आरोग्य यंत्रणेने केले आहे.