Jalgaon Summer : लहान मुलांमध्ये उन्हाळ्यात अनेक शारीरिक समस्या जाणवतात. त्यात मुख्यत्वे करून नाकातून रक्तस्राव होणे, याचे प्रमाण मोठे असून पालकांनी घाबरून न जाता योग्य ती काळजी घेतली तर वाढणारा हा विकार कमी होण्यास मदत होत असल्याचे विघ्नहर्ता हॉस्पिटलचे डॉ. भूषण चव्हाण यांनी ‘सकाळ’शी बोलताना सांगितले.

बदलत्या तापमानामुळे शरीराच्या तापमानातही बदल होतात. अशा वेळी पचायला हलके, असे अन्नपदार्थ लहान मुलांना द्यावे. (Jalgaon Summer Impact of climate change on childrens health)

त्यात मुख्यतः फळ जसे टरबूज, खरबूज, काकडी, आंबा, आवळा, तांदळाची खीर, मुगाची खिचडी, नारळपाणी, लिंबूपाणी, दही, ताक, स्वच्छ उसाचा रस, कैरीचे पन्हे, तसेच उन्हाळ्यात मुख्यतः तळलेले व मसाल्याचे पदार्थ देणे टाळावे. त्याने पोटाचे विकार उद्भवू शकतात.

उन्हाळ्यात सामान्यतः वाढत्या तापमानामुळे गरम व कोरडी हवा नाकातील लहान रक्तवाहिन्यांना इजा पोचविण्याची शक्यता असते व तसेच वारंवार नाक कोरल्यामुळे नाकातून रक्तस्राव उन्हाळ्यात होण्याचे प्रमाण लहान मुलांमध्ये अधिक आढळते.(latest marathi news)

अशावेळी लहान मुलांना घराबाहेर काढणे टाळावे व खूपच आवश्यकता असल्यास डोक्यात टोपी व नाका तोंडावर स्वच्छ कॉटनचा रुमाल बांधावा. जेणेकरून गरम व कोरडी हवा नाकात शिरकाव करण्यापासून टाळता येऊ शकते.

"बदलत्या हवामानाचा मुलांवर विपरित परिणाम होतो. मात्र पालकांनी घाबरून न जाता योग्य ती काळजी घ्यावी."- डॉ. भूषण चव्हाण, बालरोग तज्ज्ञल, विघ्नहर्ता हॉस्पिटल, पारोळा