Jalgaon News : सुरक्षारक्षक परवाना नसातना वनविभागाचे एजन्सीला कंत्राट

Jalgaon News : जळगाव वनविभागाच्या लांडोरखोरी वनोद्यानात २०१७ पासून सुरक्षारक्षक कपुरवित असलेल्या शिवा सर्विसेसकडे शासनाचा कोणताही अधिकृत परवाना नसताना वरिष्ठ अधिकाऱ्यांनी संगमनत साधून सुरक्षारक्षक पुरवण्याचा कंत्राट मिळविला आहे अशी तक्रार स्वाभिमानी शेतकरी संघटनेचे जिल्हाध्यक्ष डॉ. विवेक सोनवणे यांनी वनमंत्री सुधीर मुनगंटीवार यांच्याकडे केली आहे. (Jalgaon Contract to forest department agency without security guard licence)

तक्रारीत म्हटले आहे, की वनविभागाचा हा भोंगळ, भ्रष्ट कारभार एवढ्यावरच थांबला नसून शिवा सर्विसेसला २०१७ मध्ये खासगी सुरक्षारक्षक पुरविण्यकामी दिलेला ठेका हा कोणतीही निविदा प्रकाशित प्रसिद्ध न करता याच शिवा सर्विसेला वारंवार नियमबाह्य पद्धतीने तीन-तीन वर्षांसाठी मुदतवाढ देण्यात येत आहे.

सुरक्षारक्षक परवाना नसल्याने सदर ठेकेदार सुरक्षा रक्षकाच्या अनुषंगाने शासनाकडे जमा करावा लागणारा जीएसटी, व्यवसाय कर बुडवित आहे.

ठेकेदार व वन विभागाच्या संगनमताने शासनाच्या जीएसटी तसेच व्यवसायकर विभागाची फसवणूक केली जात आहे.

शिवा सर्विसेसच्या ठेकेदाराकडून संबंधित सुरक्षारक्षक कर्मचाऱ्यांना वेतन, ईपीएफ, ईएसआय देताना किमान वेतन कायद्याला तिलांजली दिली जात आहे. त्यामुळे आजतागायत संबंधित ठेकेदाराने शासनाचा बुडवलेला जीएसटी व व्यवसाय कर दंडासह वसूल करण्यात यावा. सुरक्षा रक्षकांना किमान वेतन कायद्यानुसार मागील थकीत ईपीएफ, ईएसआय व्याजासह देण्यात यावी अशी मागणी डॉ. सोनवणे यांनी केली आहे.