Jalgaon Crime News : शहरातील सिंधी कॉलनी परिसरातून एकाच वर्गात शिकणारे १५ वर्षीय अल्पवयीन मुलगा आणि मुलगी गुरुवारी (ता. २८) सकाळपासून बेपत्ता झाले आहेत. (Kidnapping of boy and girl studying in same class Jalgaon Crime News)

याप्रकरणी फिर्यादीवरून अज्ञात व्यक्तीविरोधात अपहरणाचा गुन्हा नोंदविण्यात आला आहे. गरिमा राजेंद्र तुलसी (वय १५) आणि रोनक दीपकसिंग (वय १५) असे बेपत्ता झालेल्या अल्पवयीन मुला-मुलीचे नाव आहे.

गरिमा आणि रोनक हे दोन्ही विद्यार्थी सिंधी कॉलनीतील एका शाळेत व एकाच वर्गात शिकतात. गुरुवारी सकाळी अकराला शाळेत आले.

मात्र, नंतर ते तेथूनच गायब झाले आहेत. त्यांच्या नातेवाइकांनी त्यांचा सर्वत्र शोध घेतला; परंतु दोघांबाबत कोणतीही माहिती मिळाली नाही.

अखेर रात्री अकराला विद्यार्थ्यांच्या पालकांनी एमआयडीसी पोलिस ठाण्यात धाव घेतली. दोन्ही अल्पवयीन मुलांना अज्ञात व्यक्तीने काहीतरी आमिष दाखवत पळवून नेल्याची तक्रार दिली आहे. त्यानुसार अपहरणाचा गुन्हा दाखल करण्यात आला आहे. पोलिस उपनिरीक्षक दीपक जगदाळे तपास करीत आहेत.