Kiran Kumar Bakale Case : मराठा समाजाविषयी आक्षेपार्ह वक्तव्य प्रकरणात दाखल गुन्ह्यात निलंबित पोलिस निरीक्षक किरणकुमार बकाले यांना अटक झाल्यानंतर न्यायालयीन कोठडीत असताना त्यांना मदत करणाऱ्या दोन पोलिस कर्मचाऱ्यांना पोलिस अधीक्षकांनी तत्काळ कारणे दाखवा नोटीस बजावून नियंत्रण कक्षात जमा करण्याचे आदेश पारित केले आहेत.

मराठा समाजाविषयी आक्षेपार्ह वक्तव्याची ऑडिओ क्लिप व्हायरल प्रकरणी तत्कालीन गुन्हे शाखेचे निरीक्षक किरणकुमार बकाले यांच्याविरुद्ध दाखल गुन्ह्यात दीड वर्ष ते फरार होते. १५ जानेवारी रोजी अटकेनंतर न्यायालयात हजर केल्यावर त्यांना दोन दिवस पोलिस कोठडी सुनावली.

पोलिस कोठडी संपल्यावर न्यायालयीन कोठडीत बुधवारी (ता.१७) व्हिडिओ कॉन्फरन्सद्वारे न्यायालयासमक्ष हजर केले. जामीन अर्जावर कामकाजाप्रसंगी त्यांना कारागृहात पाठवण्याचे आदेशित केले.

मात्र धुळे कारागृहात रवाना करण्यापूर्वी बकाले यांना मोबाईल, इअर बर्ड देऊन बोलण्याची सोय जिल्‍हापेठ पोलिस ठाण्यात पोलिसांनी केली होती.

या प्रकरणी मराठा समाजाने आक्षेप घेत चौकशी व संबंधितांवर कारवाईची मागणी केली होती. त्यानुसार शुक्रवारी (ता.१९) जिल्हापेठ पोलिस ठाण्यातील कर्मचारी ईश्वर खवले आणि चंद्रकांत पाटील अशा दोघांना कारणे दाखवा नोटीस बजावली असून त्यांना नियंत्रण कक्षात जमा केले आहे.