जळगाव : क्षमतेपेक्षा अधिक रुग्ण, कोविड नियमांचे उल्लंघन आणि रुग्णांच्या जिवावर बेतेल, असा रेमडेसिव्हिरचा वापर व ऑक्सिजनचा अनावश्‍यक वापर अशा वेगवेगळ्या व गंभीर कारणांसाठी शहरातील चार खासगी हॉस्पिटलांना प्रशासनाने नोटीस बजावली आहे.

जळगाव जिल्ह्यात कोरोनाचा संसर्ग वाढत असताना अनेक खासगी हॉस्पिटलला कोविड उपचारासाठी मान्यता देण्यात आली आहे. मात्र, काही दिवसांपासून यातील काही हॉस्पिटल मनमानी पद्धतीने कारभार करत असून, रुग्णांची लूट व त्यांच्या जिवाशी खेळ होत असल्याच्या तक्रारी समोर येत आहेत. परवानगी नसताना कोविड रुग्णांवर उपचार सुरू असून, काही ठिकाणी रेमडेसिव्हिर, ऑक्सिजनचा अनावश्‍यक वापर सुरू असल्याचे प्रकार घडत आहेत.

जिल्हा शल्यचिकित्सकांकडून तपासणी

हे प्रकार समोर आल्यानंतर जिल्हाधिकाऱ्यांच्या आदेशान्वये जिल्हा शल्यचिकित्सक डॉ. एन. एस. चव्हाण यांच्या पथकाने शहरातील खासगी हॉस्पिटलची अचानक तपासणी केली. त्यात काही ठिकाणी नियमांचे सर्रास उल्लंघन, रुग्णांच्या जिवाशी खेळ यासह काही अनियमितता आढळून आल्या.

चार हॉस्पिटलांना नोटिसा

नियमबाह्य कामे, चुकीचे उपचार यांसह अन्य विविध कारणांसाठी शल्यचिकित्सकांनी चार हॉस्पिटलांना नोटिसा बजावल्या आहेत. यात टायटन हॉस्पिटल, दत्त हॉस्पिटल (डॉ. उमेश साळुंखे), संवेदना हॉस्पिटल (डॉ. सुदर्शन पाटील) व वेदांत हॉस्पिटल (डॉ. प्रदीप कुकरेजा) यांना नोटीस बजावण्यात आली असून, दोन दिवसांत खुलासा सादर करावे, असे म्हटले आहे.

टायटन हॉस्पिटलमध्ये या गंभीर त्रुटी आढळल्या

- मान्यता नसताना कोविडचे रुग्ण दाखल

- तज्ज्ञ डॉक्टर नसताना आयसीयूत रुग्ण दाखल

- दीड महिन्यापासून रेमडेसिव्हिरचा सर्रास वापर

- ऑक्सिजनचा अनावश्‍यक वापर

- आयसीयूत युनानी डॉक्टरद्वारे उपचार

दत्त हॉस्पिटलमधील त्रुटी

- ३५ बेडची परवानगी असताना जास्त रुग्ण

- ज्यांच्या नावे नोंदणी आहे त्या डॉक्टरऐवजी युनानी डॉक्टर हजर

- रेमडेसिव्हिरची गरज नसताना रुग्णांना दिले

- ऑक्सिजनचा गरजेपेक्षा जास्त वापर

- दरपत्रक दर्शनी भागात नाही

- सोशल डिस्टन्सिंगचे पालन नाही

संवेदना हॉस्पिटलमधील त्रुटी

- ६० बेडची परवानगी असताना ७० रुग्ण

- दरपत्रक दर्शनी भागात नाही

- रेमडेसिव्हिर, ऑक्सिजनचा अनावश्‍यक वापर

- ऑक्सिजनची गरज नसलेले रुग्णही दाखल

- सोशल डिस्टन्सिंगचे पालन नाही, पीपीई किटचा वापर नाही

मान्यता निलंबित, तरीही ‘वेदांत’ सुरू

९ मार्चला डॉ. प्रदीप कुकरेजा यांच्या वेदांत हॉस्पिटलची मान्यता निलंबित करण्यात आली आहे. तरीही याठिकाणी कोविडचे पाच रुग्ण दाखल आहेत. दरपत्रक दर्शनी भागात नाही, डोनिंग व डोफिंगची व्यवस्था नाही, युनानी डॉक्टरवर काम सुरू, डॉक्टर हजर नसल्याने कोविडमुळे मृत्यू झाल्यामुळे आपण जबाबदार आहात, रेमडेसिव्हिर व ऑक्सिजनचा अनावश्‍यक वापर केल्याने तुटवडा अशा कारणांखाली या हॉस्पिटलला कठोर शब्दांत नोटीस बजावण्यात आली आहे.

संपादन- राजेश सोनवणे