जळगाव : तापी नदीच्या काठी गुरे चारतांना पाय घसरून पाण्यात बुडून शेतकऱ्याचा मृत्यू झाल्याची घटना भादली शिवारात घडली. याप्रकरणी तालुका पोलीस ठाण्यात अकस्मात मृत्यूची नोंद करण्यात आली आहे. (jalgaon-news-tapi-river-farmer-death-legs slipped)

जळगाव तालुक्यातील भादली खुर्द येथील शेतकरी सुधाकर बाबुलाल सोनवणे (वय ३८) हे भादली शिवारातील शेतात गेले होते. सोनवणे हे तापी नदीच्‍या काठालगत असलेल्‍या स्वत:च्या शेतात गुरे चारत होते. या दरम्‍यान तापी नदीत त्यांचा पाय घसरला आणि ते पाण्यात पडले. खोल पाण्यात पडल्‍याने त्‍यांना बाहेर येता आले नाही. यामुळे त्‍यांचा मृत्‍यू झाला.

नागरीकांची आरडाओरड

सुधाकर सोनवणे हे बुडत असल्‍याचे पाहून आजूबाजूच्या नागरीकांनी आरडाओरड केली. परंतु. त्‍याचा उपयोग झाला नाही. यानंतर लागलीच शोधाशोध सुरू केली असता त्यांचा मृतदेह आढळून आला नाही. साधारण एक किलोमीटर अंतरावर भोकर शिवारात तापी नदीच्‍या काठालगत त्यांचा मृतदेह आढळून आला. सुधाकर सोनवणे यांच्या पश्चात एक मुलगा, एक मुलगी, पत्नी, भाऊ, दोन बहिणी, आई असा परिवार आहे. दरम्यान, याप्रकरणी जळगाव तालुका पोलिस स्टेशनला अकस्मात मृत्यूची नोंद करण्यात आली असून रात्री त्यांच्या मृतदेहावर अंत्यसंस्कार करण्यात येणार आहे.