जळगावः औद्योगीक वसाहत परिसरातील अयोध्यानगर येथे नरेंद्र ओमप्रकाश दुबे (वय-४७) यांचे बंद घर फोडून चोरट्यांनी ७५ हजारांची (Thieves) रोकड, दागिण्यांसह १ लाख ७० हजारांचा ऐवज चोरुन (Theft) नेला. दुबे कुटूंबीय अस्थीविसर्जनासाठी गेले असतांना चोरट्यांनी त्यांचे बंद घर फाडून चोरी केल्या प्रकरणी एमआयडीसी पोलिसात (MIDC Police) गुन्हा दाखल झाला आहे.

जळगाव शहरातील अंजीठा चौफूली जवळील अयोध्यानगरात नरेंद्र दुबे हे पत्नी व मुलांसह वास्तव्यास आहेत. त्यांचे ट्रान्सपोर्ट नगरात ओम रोडलाईन्स नावाने ट्रान्सपोर्ट आहे. रविवार (ता.१० ऑक्टोंबर) रोजी नरेंद्र दुबे यांच्या सासूबाईंचे निधन झाल्याने त्यांच्या अस्थी विसर्जन कार्यक्रमासाठी नाशिक येथे गेले होते. तर, दुबे यांची पत्नी कविता व मुलांसह वाघनगरात माहेरी गेल्याने अयोध्यनगरातील घर बंद होते. सोमवारी सकाळी नवरात्र निमित्ताने ज्योत पेटविण्यासाठी दुबे यांची पत्नी कविता व मुले अयोध्यानगरात घरी आले, त्यांना घराचे कुलूप तुटलेले, तर सामान अस्ताव्यस्त पडलेला दिसला. मुलांनी ही बाब नाशिक गेलेल्या वडीलांना (नरेंद्र दुबे) कळविली.

त्यांनी लगेच एमआयडीसी पोलिस ठाण्यात कळवली. घटनेची माहिती मिळाल्यावर दुबे हे रेल्वेने दुपारी १ वाजता जळगावात पोहचले. घरातील वस्तूंची खात्री केली असता, चोरट्यांनी घरातून कपाटातील ७५ हजार रुपये रोख, २५ हजारांचे १२० चांदीचे शिक्के व ४५ हजारांचे सोन्या चांदीचे दागिणे असा एकूण १ लाख ७० हजारांचा ऐवज लांबविल्याचे समोर आले. माहिती मिळाल्यावर एमआयडीसी पोलिसांनी घटनास्थळ गाठून पाहणी केली. तसेच परिसरातील सीसीटीव्ही कॅमेरेही तपासले. याप्रकरणी सोमवारी रात्री नरेंद्र दुबे यांच्या तक्रारीवरुन एमआयडीसी पोलिसात गुन्हा दाखल झाला आहे