जळगाव : जिल्ह्यातील कोरोनाचा कहर सुरच आहे. आज देखील जिल्ह्यातील कोरोना बाधितांचा आकडा द्विशतकी आला असून नवीन 217 जणांचे अहवाल पॉझिटीव्ह आले आहेत. यामुळे जिल्ह्यातील बाधितांचा आकडा 4 हजार 803 वर पोहचला आहे. यासोबतच आज देखील जिल्ह्यात अकरा जणांचा कोरोनामुळे 'मृत्यू झाला. 
कोरोना व्हायरस रोखण्यासाठी जळगावसह अमळनेर आणि भुसावळ पालिका परिसरात सात दिवसांचा लॉकडाउन करण्यात आला आहे. लॉकडाउनमुळे कोरोनाची साखळी तोडणे शक्‍य असले तरी यापुर्वी एक'मेकांच्या संपर्कात आलेल्यांमुळे कोरोना बाधितांचा आकडा वाढता आहे. जिल्ह्यातील एकूण 862 जणांचे अहवाल तपासणीसाठी पाठविण्यात आले होते. यापैकी 673 जणांचे अहवाल निगेटीव्ह आले असून 217 जणांचे अहवाल पॉझिटीव्ह आले आहेत. यमुळे जिल्ह्यातील एकूण बाधितांचा आकडा हा 4 हजार 803 वर पोहचला आहे. 

अकरा जणांचा मृत्‍यू 
कोरोनाची लागण झाल्यामुळे अनेकांच्या प्रकृतीत सुधारणा होत नाही. वयोवृद्ध किंवा प्रतिकार शक्‍ती कमी असलेल्यांना अधिक त्रास होवून त्यांचा मृत्यू होत आहे. जिल्ह्यात एकूण बाधितांपैकी 215 रूग्णांची प्रकृती चिंताजनक असल्याचा रिपोर्ट वैद्यकिय महाविद्यालयाने दिला आहे. तर सलग दुसऱ्या दिवशी कोरोनामुळे अकरा जणांचा मृत्यू झाला असून, आतापर्यंत 293 जणांचा मृत्यू झाला आहे. 

जिल्ह्यात असे आढळले रूग्ण 
जळगाव शहर 92, जळगाव ग्रामीण 11, भुसावळ 6, अमळनेर 1, चोपडा 11, भडगाव 5, धरणगाव 2, यावल 6, एरंडोल 3, जामनेर 5, रावेर 15, पारोळा 26, चाळीसगाव 18, बोदवड 15, इतर जिल्हा 1. 

जळगाव शहरात 92 जण बाधित 
जिल्ह्यातील हॉटस्पॉट असलेल्या जळगाव शहरात आज सर्वाधिक 92 जणांचे अहवाल पॉझिटीव्ह आढळून आले. आज आढळून आलेले बहुतांश रूग्ण हे नवीन परिसरातील आहेत. यामुळे शहरातील एकूण बाधितांचा आकडा 1 हजार 95 वर पोहचला आहे.