वैभववाडी : जागतिक आरोग्य संघटनेच्या पथकाने काल (ता. ७) तिथवली येथील कोविड लसीकरण केंद्राला भेट दिली. केंद्रावर नागरिकांसाठी केलेली बैठक व्यवस्था, परिसरातील स्वच्छता, पारदर्शक नोंदणी आणि लसीविषयी योग्य पद्धतीने दिली जात असलेली माहिती हे पाहिल्यानंतर आरोग्य संघटनेचे प्रतिनिधी मुकेशकुमार जोशी यांनी या केंद्राचे आणि केंद्रावर काम करणाऱ्या सर्व आरोग्य कर्मचाऱ्यांचे कौतुक केले.

तिथवली केंद्रावर काल कोविड लसीकरण सुरू असतानाच अचानक जागतिक आरोग्य संघटनेचे प्रतिनिधी मुकेशकुमार जोशी, तालुका आरोग्य विभागाचे आनंदा जोशी हे तेथे हजर झाले. श्री. जोशी यांनी लसीकरण केंद्राची पाहणी केली. लसीकरण केंद्रावर नागरिकांसाठी बैठक व्यवस्था करण्यात आली होती. लसीकरण करण्यापूर्वी लसीविषयी माहिती दिली जात होती. याशिवाय नोंदणीची पध्दत देखील सुलभ होती. केंद्राचा संपूर्ण परिसर स्वच्छ होता. या सर्व गोष्टींचे निरीक्षक श्री. जोशी यांनी केले. नागरिकांकडूनदेखील त्यांना लसीकरण केंद्राविषयी चांगल्या प्रतिक्रिया ऐकायला मिळाल्या. त्यामुळे श्री. जोशी यांनी टीमचे कौतुक केले. उपकेंद्रातील आरोग्य कर्मचारी किर्ती गायकवाड, निलिमा कुलकर्णी, जितेंद्र गौरखेडे या सर्वांचे त्यांनी तोंड भरून कौतुक केले.