रत्नागिरी : कोरोनाची वाढती संख्या लक्षात घेऊन जिल्हा प्रशासाने अत्यावश्यक सेवेवरही बंधने आणली आहेत. ही अंमलबजावणी आजपासूनच सुरू झाली आहे. जिल्ह्यात सर्व किराणा दुकाने बंद करून घरपोच सेवा सुरू केली जाणार आहे. मेडिकलमध्ये कर्मचाऱ्यांची कोरोना चाचणी करावी लागत आहे. दुकाने उघडे दिसल्यास कारवाई करणार असल्याचा इशारा प्रशासनाने दिला आहे.

जिल्ह्यात काल एका दिवसांत ४१७ कोरोना रुग्ण सापडले. तर ६ जणांचा मृत्यू झाला. कोरोनाचा फैलाव मोठ्या प्रमाणात वाढत आहे. त्याला रोख घालण्यासाठी प्रशासनाने मोठा निर्णय घेतला आहे. जिल्ह्यात आजपासून अत्यावश्यक सेवेमध्ये मोडणाऱ्या किरणामाल दुकाने, मेडिकल यांच्यावरही निर्बंध घातले आहेत. किराणा दुकानदारांना घरपोच सेवा देण्याचे बंधनकारक केले आहे. अत्यावश्यक सेवेची दुकाने फक्त घरपोच सेवा देणार आहेत. उद्या कोणतेही दुकान उघडे दिसल्यास संबंधितांवर प्रशासनाकडून कारवाई होणार आहे.