-rat२८p४२.jpg ः KOP२३L९२००२ राजापूर ः कोदवलीत जॅकवेल परिसरात वणवा लागून नुकसान झाले.
-rat२८p४३.jpg ः KOP२३L९२००३ वणव्यामध्ये पाईपलाईन जळून खाक झाली.
----------------

कोदवलीत जॅकवेल परिसरात वणवा
पाईप, विजेच्या वायर जळाल्याने पाणीपुरवठा ठप्प, लाखोंचे नुकसान
सकाळ वृत्तसेवा
राजापूर, ता. २८ ः शहरालगतच्या कोदवली गावाला पाणीपुरवठा करणार्‍या जॅकवेल परिसरात आज सकाळी वणवा लागला. त्यामध्ये नळपाणी योजनेचे पाईप व वीजपुरवठा करणाऱ्‍या केबल जळून लाखों रुपयांचे नुकसान झाले आहे.
कोदवली गावातील राववाडी, बौद्धवाडी व आगरवाडी या तीन वाड्यांना पाणीपुरवठा करणार्‍या जॅकवेल परिसरात आज सकाळी अचानक वणवा लागला. सकाळी ११ वा.च्या सुमारास याबाबतची माहिती मिळताच या तीनही वाडीतील तरुणांनी तत्काळ घटनास्थळी धाव घेत बादलीतून पाणी आणून आग विझवण्याचा प्रयत्न केला; मात्र ऊन आणि सुकलेला पालापाचोळा, लाकडे यामुळे आगीचा अधिकच भडका उडाला. त्यामुळे आगीवर नियंत्रण मिळवणे अवघड बनल्याने येथील तरुण पराग भोसले याने तत्काळ राजापूर पालिकेच्या अग्निशमन विभागाशी संपर्क साधला. कर्मचारी अग्निशमन बंबासह घटनास्थळी दाखल झाले. दुपारी २ वा. पर्यंत आग आटोक्यात आणण्यात यश आले. या आगीत जॅकवेलवरून पाणीपुरवठा करणारे पाईप तसेच वीजपुरवठा करणार्‍या वायर जळून खाक झाल्या. आगीची माहिती मिळताच पराग भोसले, नीलेश महाडीक, राजा महाडीक, रितेश उगले, विक्रांत जाधव, अविनाश जाधव यांच्यासह सहकार्‍यांनी सुरवातीलाच जॅकवेलच्या लाईटरूमजवळील आग विझवल्याने मोठा अनर्थ टळला.
या आगीमध्ये नळपाणी योजनेच्या वीजवाहिन्या व पाईप जळाल्याने या जॅकवेलवरून होणारा पाणीपुरवठा ठप्प झाला आहे. कोदवली ग्रामपंचायतीच्या सदस्य प्रणोती भोसले व ग्रामसेवकांनी घटनास्थळी जाऊन पाहणी केली. या आगीत नळपाणी योजनेचे लाखों रुपयांचे नुकसान झाले आहे.