लोगो ः ग्रामपंचायत पोटनिवडणूक
--
देवगडात चौथ्या दिवशी
दोनच उमेदवारांचे अर्ज

सकाळ वृत्तसेवा
देवगड, ता. २८ ः तालुक्यातील १७ ग्रामपंचायतीसाठीच्या जाहीर झालेल्या पोटनिवडणुकीमध्ये उमेदवारी अर्ज दाखल करण्याच्या आजच्या चौथ्या दिवसापर्यंत केवळ दोनच उमेदवारी अर्ज दाखल झाले. येथील तहसील कार्यालयातील निवडणूक विभागाकडून ही माहिती देण्यात आली. दरम्यान, उमेदवारी अर्ज दाखल करण्याची मंगळवारी (ता.२) शेवटची मुदत आहे.
तालुक्यातील कुवळे, हडपीड, मणचे, पडेल, आरे, ठाकूरवाडी, गवाणे, गोवळ, कोटकामते, मुटाट, कातवण, सांडवे, कुणकवण, ओंबळ, पेंढरी, विजयदुर्ग आणि मळेगाव, अशा एकूण १७ ग्रामपंचायतींसाठीचा पोटनिवडणूक कार्यक्रम जाहीर झाला आहे. यातील विजयदुर्ग आणि ठाकूरवाडी या दोन ग्रामपंचायतीच्या सरपंच पदाच्या जागेसाठी ही निवडणूक होणार आहे. ठाकूरवाडीमध्ये सरपंच आणि एक सदस्य जागा रिक्त आहे. ओंबळ आणि गोवळ या दोन ग्रामपंचायतीमध्ये प्रत्येकी दोन जागा तसेच आणि उर्वरित ठिकाणी एक जागा रिक्त असल्याने एकूण १७ ग्रामपंचायतीमध्ये रिक्त असलेल्या १९ सदस्य जागांसाठी निवडणूक कार्यक्रम जाहीर झाला आहे. यासाठी आतापर्यंत केवळ दोनच उमेदवारी अर्ज दाखल झाले आहेत. यामध्ये कोटकामते आणि मुटाट अशा दोन ग्रामपंचायतीमध्ये प्रत्येकी एक अर्ज दाखल करण्यात आला असल्याची माहिती देण्यात आली.